Ёш стол тенниси усталари Қўшкўпирда жам бўлишди ФОТОГАЛЕРЕЯ

Хоразм вилояти жисмоний тарбия ва спорт бошқармаси ҳамда туман бўлими, шунингдек, Ўзбекистон стол тенниси федерациясининг вилоят бўлими ҳамкорлигида ташкил этилган мазкур мусобақада 2006-2007 ҳамда 2008-2009 йилларда туғилган ўсмирлар иштирок этишди. 

Жами 112 нафар иштирокчи қатнашган ушбу мусобақа ёшлар ўртасида соғлом турмуш тарзини тарғиб қилиш, ўғил ва қизларни спорт турларига бўлган қизиқишларини оширишга хизмат қилди. 

Мусобақанинг кичик ёшли иштирокчилар баҳсида урганчлик Диёра Қадамбоева қизлар, хивалик Тоҳиржон Жуманиёзов ўғил болалар орасида шоҳсупанинг энг юқори поғонасидан жой олди. 

Ушбу ёш тоифасида Жавҳар Саидов, Динора Маримбоева (иккаласи Урганч шаҳри) мос равишда иккинчи ўринни, Сухроб Самандаров (Урганч тумани), Фозилжон Нурметов (Боғот тумани), Кумуш Раҳимберганова, Асалой Маримова (иккаласи Урганч шаҳри) учинчи ўринни эгаллашди.

Катта ёшли қатнашчилар беллашувида Дилдора Шомуратова (Хива шаҳри) ва Комронбек Маримов (Урганч шаҳри) зафар қучди. Шунингдек, Бобур Сатторов (Хива шаҳри), Шаҳбоз Қурбонбоев (Қўшкўпир тумани), Оғабек Сапабоев (Ҳазорасп тумани), Фотима Матризаева (Урганч шаҳри), Зебинисо Қосимова (Урганч шаҳри) ва Севинчой Искандарова (Қўшкўпир тумани) совриндорлар сафидан жой олишди.

- Биринчилигимизни умумтаълим мактабида ўтказишимиз ўзига хос маъно касб этади, - дейди мусобақа бош ҳаками Замира Сапаева. – Ваҳоланки, ушбу таълим масканида таҳсил олаётган ўқувчилар мусобақани бевосита томоша қилиб, спортнинг соғликлари учун афзаликларини кўнгилдан ҳис қилишларида, бунинг баробарида, унга ошно тутинишлари йўлида амалий ёрдам кўрсатишга  қаратилган. Ишончим комилки, кўзлаган ниятимизга эришдик. Ўз навбатида ёш спортчиларимизга қувончли лаҳзаларни туҳфа этганимиздан жуда хурсандмиз.

Мусобақанинг ёпилиш маросимида ғолиб ва совриндор спортчилар Қўшкўпир тумани ҳокимлиги томонидан диплом, медаль ва совғалар билан тақдирландилар.

Икром ХУДОЙБЕРГАНОВ тайёрлади