Ёзги Универсиада: Ҳисобимизда 1 та олтин ва 2 та бронза медаллари!

Вакилларимиз орасидаги сўнгги чиқиш аралаш жамоавий дастур финалида бўлди. Ҳал қилувчи баҳсга қадар Австралия, Корея Республикаси, Германия каби терма жамоаларни мусобақадан чиқариб юборган Нажмиддин Қосимхожиев, Шоҳжаҳон Каримбоев, Мадина Мирабзалова ҳамда Диёра Азизова тўртлиги финалда Миср вакилларини 2:1 (21:12, 8:18, 13:13) ҳисобида таслим этди ва турнирнинг олтин медалига эга чиқди.

Бу таэквондо терма жамоамизнинг мусобақа доирасидаги биринчи, Ўзбекистон делегациясининг эса учинчи олтин медалига айланди. 

Бироз олдин эркаклар ўртасидаги жамовий дастурда Шоҳжаҳон Аҳмедов, Умиджон Туробов ва Марат Мавлонов учлиги мусобақада бронза медалини қўлга киритишганди.

Бундан ташқари, бугундан мусобақа доирасида дзюдо баҳслари бошланди. 48 кг вазн тоифасида юртимиз шарафини ҳимоя қилган вакиламиз Лазиза Ҳайдарова бронза медали учун кечган беллашувда полшалик Паулина Шляхтани мағлубиятга учратди ва делегациямиз ҳисобига яна бир медални тақдим этди.

Ҳозирда медалларимиз сони 13 тани ташкил қилмоқда: 3 та олтин, 4 та кумуш ва 6 та бронза.