Ёзги Универсиада: Таэквондо терма жамоамиз аъзоси Марат Мавлонов кумуш медалга эга чиқди

Таэквондо бўйича миллий терма жамоамизнинг +87 кг вазн тоифасидаги вакили Марат Мавлонов совиндорлар қаторидан жой олди. У дастлабки босқичда малайзиялик Муҳаммад Луқман Ҳакимни 2:0, чорак финалда Озарбайжон вакили Ҳамидреза Бадриалиабадини 2:1, ярим финал босқичида эса украин спортчиси Андрей Харбарни 2:0 ҳисобида таслим этганини маълум қилгандик. Мусобақанинг ҳал қилувчи беллашувида Марат Корея Республикаси термаси аъзоси Канг Сангҳюн билан баҳс олиб борди. Шиддатли руҳда кечган беллашувнинг илк раунди Маратнинг фойдасига якунланди, бироқ кейинги икки раунд биз учун омадсиз кечди.

Шунга қарамай, Мавлонов таэквондо терма жамоамиз учун илк кумуш медалини тақдим этди. Энди таэквондочилар ҳисобида 1 та кумуш ва 3 та бронза медаллари бор.

Ўзбекистон делегациясининг медаллари сони эса 9 тага етди: 2 та олтин, 4 та кумуш ва 3 та бронза.