Ёзги Универсиададаги медалларимиз 6 тага етди, 4 таси Тахминага тегишли. Ўзбекистон медаллар жамғариш бўйича нечанчи ўринда?

Мусобақанинг кечаги кунги баҳслари Ўзбекистон спорт делегацияси учун омадли келди. Бадиий гимнастикачимиз Тахмина Икромованинг бир ўзи 2 та олтин, 1 та кумуш медалларини қўлга киритди. Бир кун аввал у яна бир кумуш медалга сазовор бўлган эди. Тахмина иккинчи олтин медалига 28.700 балл эвазига тасма билан бажарилган машқларда эга чиқди.     

Таэквондо WT бўйича терма жамоамиз вакиласи Мадина Мирабзалова ўз вазн тоифасида бронза медали билан тақдирланди. Бу билан Ўзбекистон спорт делегациясининг медаллари 6 тага етди - 2 та олтин, 3 та кумуш, 1 та бронза. Медаллар жамғариш бўйича умумжамоа ҳисобида 6-ўринга кўтарилиб олдик. 

Биздан аввалги ўринлардан Италия, Германия, Хитой, Корея Республикаси ва АҚШ давлатлари жой олган. Америкалик талаба-спортчилар 9 та олтин, 6 та кумуш, 11 та бронза, жами 26 та медални қўлга киритиб улгуришди. Мустақил Давлатлар Ҳамдўстлиги мамлакатлари орасида биринчи ўринни эгаллаб турибмиз. 

Марказий Осиё давлатларидан Қирғиз Республикаси 1 та олтин ва 1 та бронза медали билан 14, 2 та бронза медалига эга Қозоғистон эса 27-поғонани банд этган. Ҳозиргача 31 давлат терма жамоалари камида 1 та медалга эга бўлишган.