Юлдузлар кўз ўнгида ўтган Гулистондаги проф бокс оқшомидан ФОТОГАЛЕРЕЯ

"Алпомиш" мажмуасида ўтказилган профессионал бокс турнирини бевосита Сирдарё вилояти ҳокими Акмалжон Маҳмудалиев кузатиб борди. Париж-2024 Олимпиадаси чемпионлари Баҳодир Жалолов, Абдумалик Ҳалоков, Лазизбек Мулложонов, Олимпиадада ёрқин жанг намойиш этган Тўрабек Ҳабибуллаев, мураббий-секундант сифатида довруғ қозонган Акмал Ҳасанов турнир меҳмонлари сифатида жангларни томоша қилишди.

Оқшомнинг марказий жанги 72 кг вазнда сирдарёлик Рамил Шукумеров ҳамда тожикистонлик Расулбек Аҳадов ўртасида бўлиб ўтди. Тўлиқ давом этган жангда Шукумеров очколар ҳисобига кўра ғалаба қозонди. Жанг давомида Рио-2016 Олимпиадаси чемпиони Фазлиддин Ғоибназаров Рамилни қўллаб-қувватлаб, унга ринг ташқарисидан кўрсатмалар бериб турди.

Боксчиларни тақдирлаш маросимида Ўзбекистон профессионал бокс федерацияси президенти Умид Якубов, федерация биринчи вице-президенти Ғофур Раҳимов ва бошқа мутасаддилар иштирок этишди.  

Кечаги проф бокс турнирида Улуғбек Тўрабеков (Сирдарё), Ҳаётбек Машрабов (Фарғона), Иқбол Салимов (Тожикистон), Исломбек Мўминов (Тошкент вилояти), Миралижон Мавлонов (Бухоро), Миркомил Сайтоҳунов (Андижон), Темурбек Хазратқулов (Сирдарё) сингари боксчилар ғалаба қозонишди. Муҳаммадазиз Ўктамов (Фарғона) ва Фахриддин Маматхўжаев (Андижон) ўртасидаги жангда дуранг натижа қайд этилди.