Юнон-рим курашчиларимизнинг йиғини Дукентга кўчди

Бутун дунё бўйлаб кенг тарқалиб бораётган коронавирус балоси сабаб бошқа спорт турларида бўлгани каби спорт курашиларимизнинг ҳам олдиндан тасдиқланган йиллик режалари батамом ўзгариб кетди. Коронавирус сабаб барча халқаро мусобақалар бекор қилинди. 

Шундай бўлса-да, эркин, юнон-рим ва аёллари кураши бўйича катталар терма жамоаларимизнинг машғулоти бир зумга ҳам тўхтагани йўқ. Ҳар қандай ҳолатда ҳам курашчиларимиз юқори спорт формасида мусобақаларга тайёр бўлишлари лозим. Олдинда эса бизни Олимпиада лицензион турнири кутиб турибди. 

Шуни инобатга олган ҳолда Ўзбекистон спорт курашлари ассоциацияси томонидан терма жамоамизнинг режаларига ўзгартириш киритилди. Юнон-рим курашчиларимиз айни пайтда Дукентда машғулотларга зўр беришган. Ушбу йиғин 21 мартга қадар давом этади. Унда асосий эътибор жисмоний тайёргарликка қаратилади. 

Хабарларга қараганда, Бутундунё спорт курашлари май ойигача ўтказиладиган барча халқаро мусобақаларни бекор қилган. Агар барчаси ижобий томонга ўзгарса, Токио-2020 Олимпиадасининг лицензион турнири май ойида бўлиб ўтади.