Юнон-рум курашчиларимиз Осиё чемпионатининг иккинчи кунини иккита кумуш, умумий ҳисобда эса мусобақани 6 та медаль билан якунлашди

Мусобақанинг кечаги кунги беллашувлари доирасида Ўзбекистон терма жамоасининг беш нафар вакили гиламга чиқди ва якунда 2 та кумуш медали қўлга киритилди.

-60 кг вазнли Алишер Ғаниев финал беллашувида Корея Халқ Демократик Республикаси вакили Се Унг Рига 4:6 ҳисобида имкониятни бой бериб қўйган бўлса, -72 кг вазн тоифасидаги ҳамюртимиз Абдулло Алиев эронлик Сейед Шамсоллах Сохраби олдида ожиз қолди.

Нозимжон Бойқўзиев (-67 кг) ва Муҳаммадқодир Расулов (-82 кг) эса бронза медаллари учун кечган баҳсларда рақибларига имкониятни бой беришди. -97 кг вазндаги Беҳруз Барноев мусобақани чорак финалда тарк этди.

Шу тариқа, мусобақанинг иккинчи кунини 2 та кумуш медали билан якунига етказдик. Рустам Ассакалов шогирдлари қитъа биринчилигини умумий ҳисобда 3 та олтин, 2 та кумуш ва 1 та бронза медали билан ниҳоясига етказди.

Бугундан мусобақа доирасида аёллар ўртасидаги баҳслар бошланади.