Зўравонлик айблови ва жароҳатлар билан курашган ҳамда Ўзбекистонга қарши ўйнаган "Нефтчи"нинг янги легионери билан танишамиз

Мишелнинг футболдаги йўли Сан-Паулу штатидаги Аваре шаҳарчасидаги "Интернасионал" маҳаллий футбол мактабида бошланган бўлиб, дастлаб у марказий ҳужумчи позициясида ҳаракат қилган ва мунтазам голлар уриб юрган. Бироқ унинг гавда тузилиши ва бўйини кўрган мутахассислар унга ҳимоячи амплуасига ўтишни маслаҳат беришган. Шундан сўнг у Паранадаги "PSTC" жамоаси кўригига айнан ҳимоячи сифатида бориб, Фишер исмли мутахассиснинг эътиборига тушган ва 2019 йилда "Палмейрас" тизимига қабул қилинган.

"Палмейрас" академиясида Мишел тезкорлиги, техник ҳаракатлари ҳамда 1,88 метр бўйи сабабли "иккинчи қаватдаги" ҳаволатиб узатилган тўплар учун курашлардаги кучли ўйини билан тезда ажралиб турди. Унинг кундалик ҳаётдаги асосий қоидаси "майдондан ташқарида – дўстлик, майдон ичида эса – меҳнат ва жиддийлик" эди. Ўзининг кумири сифатида "Палмейрас" афсонаси Фелипе Мелони кўрган бу йигитнинг тинимсиз меҳнатлари 2021 йилнинг 9 май куни ўз мевасини берди. У 17 ёшида Паулиста лигаси доирасида "Понте Прета"га қарши кечган баҳсда (3:0) асосий таркибда майдонга тушиб, тўлиқ 90 дақиқа ҳаракат қилди ва профессионал дебютини нишонлади. Дебют ўйинининг ўзидаёқ у учта тўпни узоқлаштириш, иккитасини олиб қўйиш ва узатмаларда 91% аниқлик қайд этиб, ҳеч бир рақибга ўзини алдаб ўтишга йўл қўймади. Ушбу воқеадан сўнг ҳис-туйғулари билан ўртоқлашаркан, Мишел шундай деган эди:

"Жуда бахтиёрман. Худога шукур, Палмейрасдек шонли тарихга эга буюк клубнинг асосий жамоасида дебют қилиш орзуим ушалди".

Ёшлар тизимида Сан-Паулу ўсмирлар кубоги, U-20 ва U-17 Бразилия чемпионатлари ҳамда кубокларида кўплаб зафарларни қучган ҳимоячи Бразилия терма жамоаларининг ҳам диққат марказида бўлди. 2023 йилнинг 22 апрелида у Бразилия U-20 терма жамоаси сафида Испанияда ўтказилган ўртоқлик учрашувида Ўзбекистон ёшларига қарши майдонга тушди ва жамоасининг 4:1 ҳисобидаги иродали ғалабасига ўз ҳиссасини қўшди. Худди шу йили Мишел терма жамоаси билан Пан-Америка ўйинларида олтин медални қўлга киритди.

Унинг машҳурлиги ҳатто виртуал оламга ҳам кўчиб, геймерлар "EA FC 24" ўйинининг "Career Mode" ва "Pro Clubs" режимлари учун футболчининг қиёфасини яратиш бўйича махсус видеоқўлланмалар ишлаб чиқишди.

Аммо унинг карьераси жиддий синовлар ва йўқотишлар билан ҳам кечди. Мушакларидаги жароҳатлар унга энг муҳим паллаларда панд берди: 2023 йилнинг январида чап оёқ сонидаги мушак йиртилиши сабабли U-20 Жанубий Америка Кубогидан қуруқ қолган бўлса, 2024 йилнинг февралида Олимпия саралаш турнирида иккита ўйинда асосий таркибда майдонга тушгач, ўнг оёқ сонидаги жароҳат туфайли терма жамоадан четда қолди.

Майдон ташқарисидаги ҳаёти эса янада зиддиятли воқеаларга бой бўлди. 2022 йилнинг августида унинг олти ойлик ҳомиладор бўлган собиқ қайлиғи, 23 ёшли тиббиёт талабаси Ариатине Менисе футболчини маиший зўравонликда айблади. Қизнинг таъкидлашича, Мишел ҳомиладорликни қабул қила олмай шафқатсизлашиб қолган ва май ойидан бери уни беш марта калтаклаган. Мишелнинг адвокати Велтон Роберто бу айбловларни кескин инкор этиб, қизнинг ўзи футболчининг квартирасини вайрон қилганини ҳамда бу ҳаракатлар молиявий манфаат кўриш мақсадида қилинган шантаж эканлигини таъкидлади. Ҳар икки томон бир-бирига яқинлашмаслик тўғрисида суд ордерини талаб қилди ва бу можаро сабабли "Палмейрас" раҳбарияти вазиятга ойдинлик киритилмагунча Мишелни вақтинчалик ўйинлардан четлаштирди. Ўзининг Инстаграм саҳифасида спортчи бу айбловларни рад этиб, шундай ёзган эди:

"Мен буни тўғри қабул қилганман ва унга ҳамда қизимга имкон қадар энг яхши муносабатда бўламан. Оталик масъулиятидан қочмайман".

Европа футболига йўл олиш орзуси Португалиядан аввалроқ, 2023 йилнинг август ойидаёқ амалга ошиши мумкин эди. Ўшанда Мишел Грециянинг "Арис" клуби сафига ижара асосида бориб қўшилишга жуда яқин келганди. Бироқ томонлар ўртасидаги ижара келишуви охир-оқибат муваффақиятсизликка учради ва футболчи карьерасини яна Бразилияда давом эттиришга мажбур бўлди. Сабаби, у "Палмейрас" U20 билан "Фламенго"га қарши Бразилия чемпионати финалини ўйнашни хоҳлаган. Грек клуби трансфер ойнаси ёпилиши яқинлашгани учун кутмади ва келишув бузилди.

Кўпроқ ўйин амалиётига эга бўлиш мақсадида Мишел 2025 йилнинг 31 январида Португалиянинг "Морейренсе" клубига бир ярим йиллик ижара шартномаси асосида ўтди. Дастлабки мослашиш даври қийин кечган бўлса-да, чемпионатнинг иккинчи ярмида у мунтазам равишда майдонга туша бошлади ва "Эшторил" ҳамда "Авеш" клубларига қарши ўйинларда ишончли ҳаракат қилиб, 2025/2026 йилги мавсум кашфиётларидан бири бўлиши кутилаётган эди.

Бироқ 2026 йилнинг апрель ойига келиб вазият кутилмаган тус олди. "Морейренсе" жамоаси футболчининг машғулотларни узрли сабабларсиз қолдирганини важ қилиб, у билан шартномани бир томонлама бекор қилиш жараёнини бошлади ва марказий ҳимоячи бош мураббий Васко Ботельо да Коштанинг таркибидан четлатилди. Мишелнинг ҳимоячилари эса бунинг сабаби сифатида футболчи Португалияда ксенофобия ва маънавий тазйиқлар қурбонига айланганини, шунинг учун машғулотларга бора олмаганини иддао қилишди. Португал клуби бу айбловларни кескин рад этди.

Гарчи 2024 йилнинг июлида "Палмейрас" билан шартномасини 2028 йилнинг декабрига қадар узайтириб, клубини ўзининг "иккинчи уйи" деб атаган бўлса-да, Португалиядаги воқеалардан сўнг Бразилияга қайтган ҳимоячи билан "Палмейрас" ҳам 2026 йилнинг июнь ойида шартномани бекор қилди. Мишел шартномаси якунига қадар белгиланган маблағни тўлиқ олишни талаб қилиб клубнинг бу қарорини рад этишга уринган бўлса-да, "Палмейрас" уни аллақачон жамоанинг бир қисми эмас деб ҳисобларди. Мана шундай кескин бурилишлар, улкан умидлар ва кутилмаган зарбалардан сўнг, бразилиялик ҳимоячи ўз фаолиятини қайта тиклаш учун "Нефтчи" сафида янги имкониятга эга бўлди.