Zuffa Boxing`нинг илк чемпиони аниқланди, у энди IBF камаридан айрилади

Унда австралиялик мағлубият ва муроса нималигини билмай келаётган 30 ёшли Жей Опетайя (30-0, 23 КО) америкалик 34 ёшли Брендон Глентон (21-3, 18 КО)га қарши рингга кўтарилди. Ўн икки раунд тўлиқ давом этган жангда Опетайя рақибини ҳакамларнинг якдил қарори билан мағлубиятга учратди ва биринчи оғир вазнда Zuffa Boxing чемпионлигини қўлга киритди. 

IBF ва The Ring камарларига эга бўлган Опетайя 119-106, 119-106, 119-106 ҳисобида ғалаба қозонди. Ўн биринчи раундда ҳакам Опетайяни рақибни ушлаб қолгани учун жазолади. Глентондан эса олтинчи ва саккизинчи раундлардаги қоидабузарликлар учу очко олиб ташланди. 

Ғалабадан сўнг Опетайя ҳали ҳам биринчи оғир вазн тоифасидаги унвонларни бирлаштирмоқчи эканлиги ҳамда 2 май куни WBA ва WBO йўналишлари чемпиони Хилберто Рамирес ва Дэвид Бенавидес ўртасидаги жанг ғолиби билан учрашмоқчи эканлигини айтди.

IBF эса Опетайянинг чемпионлик унвонидан маҳрум қилади. Гарчи ташкилот аввалроқ Глентон билан жангга рухсат берган бўлса-да, кейин ўз санкциясини қайтариб олди. Бироқ, Опетайя аллақачон комиссия тўловларини тўлаган ва IBF қоидаларида кўрсатилган жанг куни қўшимча вазн ўлчашдан ўтган.

"Мен камарларни қўлга киритишга интиламан. Шов-шув кўп бўлганини биламан, лекин умид қиламанки, ҳаммаси яхши бўлади ва биз бу мақсадга эриша оламиз, - деди Опетайя. - Мен ўз йўлимдан қайтмайман. Мени камардан маҳрум қилишди. Мен уни қайтараман ва мутлақ чемпионга айланаман".

Таъкидланишича, Опетайя жамоаси IBF қарори устидан шикоят қилиш учун асосга эга. Тарихда боксчилар буни муваффақиятли амалга оширган ҳолатлар ҳам бўлган. Мисол учун, Грациано Роккижани WBC уни чемпионликдан маҳрум қилганда, қарши даъво билан ташкилотни деярли банкрот қилган, Мануэль Чарр эса ўзини WBA мунтазам чемпиони мақомига тиклашга муваффақ бўлган эди.