2025 yilgi mavsum uchun dzyudo qoidalariga ayrim o'zgarishlar kiritildi

Xalqaro dzyudo federaciyasi (IJF) tomonidan tashkil etilgan ikki kunlik seminarda qoidalarga kiritilgan o'zgarishlar referilarga etkazildi. 2025 yilgi mavsumdan etiboran bu yangi qoidalar asosida musobaqalar o'tkaziladi. 

Bu muhim seminarda bir guruh hakam va murabbiylarimiz ham ishtirok etishdi. Ular orasida xalqaro Olimpiya toifasidagi referilarimiz Ramziddin Saidov, Vyacheslav Pereteyko, O'zbekiston dzyudo federaciyasi Hakamlar hayati raisi Bahodir Uzakberganov, murabbiylar Tohir Fayziev, Iskandar Rasulov, Aziz Toshmatov, Rahim Subhonovlar bor.  

Dzyudo qoidalariga kiritilgan o'zgarishlar: 

• Ne-vadzada uchinchi yuko bahosi qo'shildi (Bu baho 5 soniya ushlab turilganidan keyin beriladi)

• Usul bajarilayotgandagi tashlash holatida bosh bilan harakat qilish hamda himoyalanish uchungina boshdan foydalanish. Bu yangilik kadetlar o'rtasidagi musobaqalar uchun emas. Kadetlarda bu usuldan foydalanish shido ogohlantirilishi bilan jazolanadi

• Kimono hamda belbog'ning pastki qismidan to oyoqning ichki son yuqorisigacha bo'lgan qismida barcha ushlash (zaxvat) holatlariga ruxsat beriladi. SHunga teskari holatda, yani ko'rsatilgan joyning yuqori qismidan ushlash holatlarida shido ogohlantirishi beriladi

• Qo'lning kaft yoki bilak qismi bilan oyoqdan ushlash, pastki kiyim, yani ishtondan ushlash (zaxvat), oyoqning tizzadan pastki qismiga teginish, ichki son qismidan ushlab pastga tortish taqiqlanadi va shido ogohlantirishi bilan jazolanadi

• Kumi-kata qoidasi. Hujum uchun 30 soniya vaqt beriladi

• Tachi-vazada ikki qo'l bilan quchoq ochib ushlash (zaxvat)ga ruxsat beriladi. Lekin kaft va bilaklarni xalqa shaklida birlashtirgan holatda zaxvatga kirish shido bahosi bilan jazolanadi

• Tatamidan tashqariga chiqish holati atayin qilinmaganda (tachi-vaza va ne-vaza) "Mate!", yani to'xta buyrug'i beriladi

• Kansetsu-vaza qo'llashda yangi qoidalar. Agar kansetsu-vaza tashlash vaqtida jarohat olish xavfi yuqori bo'lsa, hansoke-make jarima jazosi beriladi. 

• Agar kansetsu-vaza ikki qo'l bilan raqibning bitta qo'liga nisbatan qo'llanilsa (jarohat olish xavfi kam bo'lsa), “Mate!” buyrug'i bilan to'xta ishorasidan keyin shido ogohlantirishi beriladi

• Ne-Vadzada ijobiy faollik referi tomonidan inobatga olinadi

• Teskari seoi-nage usuliga kattalar va yoshlar o'rtasidagi musobaqalarda ruxsat beriladi. Lekin kadetlar musobaqasida shido ogohlantirilishi bilan jazolanadi