Angrenda uyushmagan yoshlar o'rtasida eng kuchlilar saralandi

Endilikda respublikaning har bir hududida sog'lom turmush tarzining tatbiq etilishiga oid tadbirlar ko'lami yanada kengaydi.

Xususan, kecha Toshkent viloyati Angren shahridagi “Empire Fitness” fitnes klubida noananaviy tarzda musobaqa tashkil etildi. Unda og'ir atletika turi bo'yicha aholi qatlamining uyushmagan yoshlari, yani 18 yoshdan 30 yoshgacha bo'lgan yigitlar kuch sinashdilar.

Angren shahar hokimligi, Bolalar-o'smirlar sport maktabi, Jismoniy tarbiya va sport bo'limi hamda xususiy tadbirkor Yashin Noralievlar tomonidan hamkorlikda tashkil etilgan bahslarda fitnes klubining 55 nafar azosi o'zaro bellashdilar. Bahslarning ochilish va taqdirlash marosimida bag'ishlangan tadbirda shahar hokimi SHukurulla Mahmudov, Jismoniy tarbiya va sport bo'limi hamda jamoat va davlat tashkilotlari vakillari qatnashdilar.

Tadbirda so'z olganlar ayni paytda davlatimiz rahbarining tashabbusi bilan aholi salomatligini mustahkamlash va sog'lom hayot tarzini yanada takomillashtirish borasidagi islohotlar va joylardagi keng ko'lamli tadbirlar xususida fikr bildirdilar.

Musobaqa natijalariga ko'ra, o'z vazn toifalarida o'smirlar o'rtasida birinchi o'rin X.Sultonqulov («Do'stlik» MFY)ga nasib qildi. Ushbu yo'nalishda A.Hoshimov (CHotqol« MFY) ikkinchi o'rinni, D.To'xtasinov (»Karvon") esa 3-o'rinni qo'lga kiritdi.

Kattalar o'rtasidagi qizg'in bahslarda SH.Azimov («Taraqqiyot» MFY) 1-o'ringa sazovor bo'ldi. Bellashuvlarda faol qatnashgan R.Xudoyberganov ikkinchi, («Navro'z-1» MFY), B.Ahmedov («Navbahor» MFY) uchinchi o'rinlarni band etishdi.

G'oliblarni shahar hokimi SH.Mahmudov esdalik sovg'alari va faxriy yorliqlar bilan taqdirladi.