Besh soat ichida ikki uchrashuvda g'alaba qozongan Sultonov Portugaliya turniri finalida!

Mukofot jamg'armasi 25 000 AQSH dollarini tashkil qiluvchi ushbu musobaqada mamlakatimizning birinchi va ikkinchi raketkalari Humoyun Sultonov hamda Sergey Fomin ham ishtirok etyapti. Fomin yakkalikning 1/4 finalida bo'lajak finalchi, ispaniyalik Martin Landalusega 1/6, 6/7, tay-brekda 10:12 hisobida imkoniyatni boy bergandi.

Kecha Fomin va Sultonov birgalikda juftlik bahsida ham kortga chiqishdi va portugaliyalik tennischilarga yutqazib qo'yishdi. Humoyun juftlikdan tashqari yana ikkita yakkalik uchrashuvida ham kortga chiqdi va har ikkisida ham g'alaba qozonib, musobaqaning finaliga yo'l oldi.    

Sultonov avvaliga 1/4 finalda ispaniyalik Karlos Lopes Montagudni qiyinchilik bilan 7/6(7), 5/7, 7/6(4) hisoblarida mag'lub etdi. Yarim final uchrashuvida esa braziliyalik Karue Selldan ortiqcha qiyinchiliksiz ustun keldi - 6/3, 6/0. 

Bugun hamyurtimiz musobaqa bosh sovrini uchun Martin Landalusega qarshi kortga chiqadi. Ispaniyalik bu tennischi chorak finalda Sergey Fominni yutgandi. Sultonov - Landaluse bahsi bizning vaqt bilan soat 17:00da boshlanadi. 

Taqqoslash uchun, turnirda to'rtinchi raqam ostida tasniflangan Sultonov ATP reytingida 354, Montagud 430, Sell 666, Humoyunning finaldagi raqibi Landaluse 465-pog'onani egallab turibdi.