Besh tashabbus olimpiadasi: CHirchiqda eng kuchli stritbol jamoalari aniqlandi

Sportning stritbol turi bo'yicha musobaqaning “A“ liga respublika bosqichi bahslari CHirchiq Olimpiya va paralimpiya sport turlariga tayyorlash markazida tashkil etildi. Uch kun davom etgan qiziqarli bellashuvlar ishtirokchilarda musobaqa ko'nikmasi oshishiga sabab bo'lgan bo'lsa, ishqibozlarga katta sport zavqini tortiq etdi.

Mahoratli sportchilarni aniqlash, saralash bilan birgalikda ommaviy sport rivojiga katta hissa qo'shgan bellashuvlar sarhisobiga ko'ra, 16-21 yoshli o'g'il bolalar o'rtasida umumjamoada Toshkent viloyati, 22-30 yosh toifasida Namangan viloyati jamoasi g'oliblik shohsupasiga ko'tarildi. Sovrinli o'rinlar Farg'ona, Andijon, Jizzax viloyatlari va poytaxt jamoalariga nasib etdi.

Musobaqaning ayollar o'rtasidagi bellashuvlarda umumjamo bo'yicha 16-21 yoshlar toifasida Toshkent viloyati, 22-30 yoshlar toifasida esa Surxondaryo viloyatining stritbolchilari 1-o'rinni egallashdi. 2-3-o'rinlardan Qashqadaryo, Jizzax, Toshkent hamda Andijon viloyatlaridan kelgan jamoalar joy oldi. Respublika bosqichida g'olib va sovrindor bo'lganlar diplom, medal va esdalik sovg'alari bilan taqdirlandi.

Eslatib o'tamiz, stritbol bitta basketbol halqasida yarim maydonda o'tadigan musobaqa bo'lib, 1950 yillari Amerika Qo'shma SHtatlarda paydo bo'lgan. Jamoalar 3 nafardan iborat sportchi bilan bahslarda ishtirok etadi.