Boks. O'zbekiston yoshlar terma jamoasi murabbiyi: Raqib tanlab o'tirmaymiz

O'zbekiston boks federaciyasi matbuot xizmati terma jamoamiz katta murabbiyi Hamid Tangribergenovning musobaqa oldidan fikrlari bilan qiziqdi. 

"Yoshlar o'rtasidagi Osiyo chempionati start oldi. Biz ushbu musobaqaga jiddiy tayyorgarlik olib bordik. Bokschilarimiz uchun etarli sharoitlar yaratib berildi. Umuman olganda, Osiyo chempionatiga tayyorgarlik yaxshi o'tdi. Biz musobaqaga tayyormiz.

Qura omadli keldimi? O'zbek bokschilari Olimpiya o'yinlarida, jahon chempionatida, Osiyo chempionatida umumjamoa hisobida birinchi bo'lishdi. O'smirlarimiz ham yaqinda qitada tengsiz ekanliklarini isbotlashdi. SHunday ekan, biz qura haqida gapirishimiz shart emas. Etakchilikka davo qilar ekanmiz, raqib tanlab o'tirmaymiz. Musobaqaga keldikmi, har bir raqibni mag'lub etishimiz shart. Biz uchun adolatli, odilona hakamlik bo'lsa kifoya.

Bokschilarimiz jismoniy tomonlama tayyorlar. Tayyorgarlikning so'nggi bosqichida biz ruxiy masala bo'yicha ishlar olib bormoqdamiz. Umid qilamanki, barchasi yaxshi o'tadi va biz yurtimizga yorug' yuz bilan qaytib boramiz", - dedi Hamid Tangribergenov.

O'zbekiston boks federaciyasi matbuot xizmati (Ulan-Bator shahridan)