SHaxmatchilarimiz Osiyo Millatlar kubogini g'alaba bilan boshlashdi. Bugun Hindistonga qarshi o'ynaymiz!

O'zbekiston terma jamoasi musobaqada erkaklar o'rtasida to'rt, ayollar o'rtasida besh shaxmatchi bilan qatnashyapti. Jamoaviy musobaqa shveycarcha tizimda, to'qqiz turdan iborat bo'ladi. Har bir shaxmatchiga partiya uchun 90 daqiqa beriladi, har bir yurishdan keyin esa soatiga 30 soniya qo'shiladi.

O'zbekiston erkaklar terma jamoasi Osiyo Millatlar kubogining birinchi turida falastinlik shaxmatchilarga qarshi bahs olib borib, ishonchli 4:0 hisobida g'alaba qozondi. Muhammadali Abdurahmonov, Bahrom Baxrillaev, Abdumajid Botiraliev va SHerali Ravshanov raqiblaridan ustun kelgan holda jamoamizga ishonchli hisobdagi g'alabani taqdim etishdi. 

Bugun shaxmatchilarimiz 2-turda yulduzli tarkibga ega Hindiston terma jamoasiga qarshi dona surishadi. Hind grossmeysterlari 1-turda Livan terma jamoasini 4:0 hisobida dog'da qoldirishdi. Birinchi turda Rossiya Nepalni, Xitoy Yangi Zelandiyani, BAA 3 jamoasi BAA 1 shaxmatchilarini, Ummon Malayziyani, Suriya esa Gonkongni 4:0 hisobida engdi. 

HINDISTON — O'ZBEKISTON (Juftliklar)

Nihal Sarin (GM 2720) — Humoyun Begmuratov (GM 2517)

Pranav (GM 2679) — Bahrom Baxrillaev (IM 2400)

Pranesh (GM 2673) — Abdumajid Botiraliev (FM 2368)

Aravindh CHitambaram (GM 22673) — SHerali Ravshanov (FM 2365)

O'zbekiston ayollar terma jamoasi ham Osiyo Millatlar ligasi musobaqasini ishonchli g'alaba bilan boshladi. Qizlarimiz Pokiston terma jamoasidan 4:0 hisobida ustun kelishdi. Afruza Hamdamova, Gulruhbegim Toxirjonova, Umida Omonova va Nilufarxon Imomqo'zieva o'z partiyalarini g'alaba bilan yakunlashdi. Bugun 2-turda O'zbekiston - Qozog'iston qarama-qarshiligiga guvoh bo'lamiz.  

QOZOG'ISTON — O'ZBEKISTON (Juftliklar)

Meruert Kamalidenova (IM 2400) — Afruza Hamdamova (WGM 2447)

Kseniya Balabaeva (WGM 2396) — Gulruhbegim Toxirjonova (IM 2349)

Elnaz Kaliaxmet (WIM 2383) — Umida Omonova (WGM 2310)

Zarina Nurgalieva (WIM 2292) — Nilufarxon Imomqo'zieva (WFM 2305)