Boks. Yoshlar o'rtasidagi Osiyo chempionati oldidan: vazn toifalar, jang sanalari va mo'g'ul jurnalistlarining O'zbekiston mashg'ulotiga tashrifi + FOTO

O'zbekiston terma jamoasi ushbu musobaqada ishtirok etish uchun 5 noyabr kuni Ulan-Batorga etib kelgani haqida xabar bergandik. Terma jamoamiz 18 nafar bokschi bilan (10 nafar o'g'il bolalar, 8 nafar qizlar) bahslarda qatnashadi. 

Umuman olganda musobaqa 20 ta vazn toifasida tashkil etiladi: 10 ta o'g'il bolalar, 10 ta qiz bolalar. 

Bahslar quyidagi vazn toifalarida o'tkaziladi:

O'g'il bolalar: -49 kg, -52 kg, -56 kg, -60 kg, -64 kg, -69 kg, -75 kg, -81 kg, -91 kg, +91 kg.

Qizlar : -48 kg, -51 kg, -54 kg, -57 kg, -60 kg, -64 kg, -69 kg, -75 kg, -81 kg, +81 kg.

Musobaqada 2001 va 2002 yillarda tug'ilgan bokschilar ishtirok etishadi. 

Ertaga, 9 noyabr kuni musobaqaning rasmiy tadbirlari tashkil etiladi: mandat komissiyasi, texnik miting va qura tashlash marosimi. 

10 noyabr kuni esa bahslarga start beriladi. 13-14 noyabrda chorak final bahslari bo'lib o'tadi. 15 noyabrda esa sportchilar dam olishadi. 16 va 17 noyabr kunlariga esa mos ravishda yarim final hamda final bellashuvlari belgilangan.

Bahslar Ulan-Batordagi "Buyant Ukhaa" sport majmuasida o'tkaziladi.

Terma jamoamizning musobaqadagi tarkibini yana bir marotaba eslatib o'tamiz:

(Nomlarni eslab qoling, ushbu tarkibda o'zbek boksining bo'lajak yulduzlari jamlangan)

O'g'il bolalar:

-49 kg: SHahzod Muzaffarov

-52 kg: Mirzabek Mirzahalilov

-56 kg: Hurshidbek Rasuljonov

-60 kg: Rahmatullo Toshpo'latov

-64 kg: Javlonbek Yo'ldoshev

-69 kg: Nurislom Ismoilov

-75 kg: Suhrobjon Qayimov

-81 kg: SHohjahon Abdullaev

-91 kg: Amirshoh Samadov

+91 kg: Mirmuhsin Mahmudov

Katta murabbiy: Hamid Tangribergenov

Murabbiylar: Sirojiddin Naimov, Hamza Avezov, Botirjon Mahmudov, Ahror Yodgorov, Sardor Abdullaev.

Qizlar:

-48 kg: Marjona Savrieva

-51 kg: Saydiniso Muhammadalieva

-54 kg: Nasiba Hayrullaeva

-57 kg: Sitora Turdibekova

-60 kg: Ziyoda Yarasheva

-64 kg: Dilfuza Bekova

-69 kg: Xadichabonu Abdullaeva

-75 kg: Navbahor Hamidova

Katta murabbiy: Kamoliddin Mutalov

Murabbiylar: Dilmurod Hasanov, Murod Haytov, SHahzoda Umarova.

SHifokor: Xurshid Mirgaliev

Qahramon Karimov chempionatda hakam sifatida faoliyat olib boradi. 

Musobaqada vakillarimizga mezbon Mo'g'uliston, Qozog'iston va Hindiston terma jamoalari asosiy raqobatni ko'rsatishlari kutilmoqda. 

Ayni paytda bokschilarimiz Mo'g'ulistonda mashg'ulot olib borishmoqda

Terma jamoa shifokori Hurshid Mirgaliev ham bokschilarimiz bilan birga

Bu esa Tmun. Mo'g'ulistonlik maktab o'quvchisi. Terma jamoamizga "volontyor" sifatida biriktirilgan. Rus tilini juda yaxshi biladi

Kuni kecha mashg'ulotlarga mahalliy OAV xodimlari ham tashrif buyurishdi

Mahalliy jurnalistlar terma jamoamiz katta murabbiyi Hamid Tangribergenovdan intervyu olishmoqda

Aziz To'xtamurodov, Ulan-Bator, Mo'g'uliston