Bo'lajak raqibimiz Quvaytning shashti baland

Dastlabki uchrashuvda hamyurtlarimiz Quvayt termasi bilan kuch sinashadi. Quvayt qishki o'yinlar associaciyasi prezidenti Fahid Al-Ajmi Armanistonda bo'lib o'tadigan jahon chempionatida hamyurtlari umidli o'yin ko'rsatishiga ishonch bildirmoqda .

Latviyalik murabbiy Andris Bartkevich boshchiligidagi terma jamoa dastlab o'z yurtida yig'in o'tkazdi, aprel oyi boshida Erevanda o'tadigan jahon chempionati oldidan esa Bolgariyada shug'ullanishlari ko'zda tutilgan.

Uzoq yillar Germaniyada ishlagan latviyalik mutaxassis Andris Bartkevich shu yil qishda Xitoyda bo'lib o'tgan Osiyo o'yinlari oldidan Quvayt terma jamoasiga bosh murabbiy etib tayinlangandi.

- Keskin kurashda faqat Qirg'iziston termasidan engildik. Raqibimiz jahon chempionatlari tasnifida bizdan ikki divizion yuqori ekanini inobatga olinsa, yomon natija ko'rsatmadik. Osiyo o'yinlaridagi tajriba bizga jahon chempionatida qo'l keladi, - dedi Fahid Al-Hajmi. 

Malumot o'rnida, Osiyo o'yinlarida Quvayt qo'shimcha vaqtda (overtaymda) 8-9 hisobida qirg'izistonliklardan mag'lubiyatga uchragan bo'lsa, so'ngra Singapur (10-3), Bahrayn (34-0) va Turkmaniston (8-4) ustidan zafar quchdi.

Eslatib o'tamiz, IIHF tasarrufidagi jahon chempionati IV divizion o'yinlari Armaniston poytaxti Erevan shahrida o'tkaziladi.

Mirzahakim To'xtamirzaev