Boynazarov Toshkentga kela olmasligi sababini tushuntirdi

Markaziy janglardan biri bo'lishi kutilgan Anvar Boynazarov ishtirokidagi bahs o'tkazilmaydi. Bunga Bangkokdan Toshkentga ucha olmagan samolyot sabab bo'ldi.

“Afsuski, kutilmagan holat ro'y berdi. 2-3 kundan beri Bangkok shahridan Toshkentga ucha olmayapmiz. Toshkentga uchishi kerak bo'lgan havo laynerida nosozlik yuzaga kelgan. Nosozlikni bartaraf etishga bo'lgan barcha urinishlar besamar ketdi.

Mendan tashqari, O'zbekiston Respublikasida xizmat ko'rsatgan artistlar ham bor edi. Xatto ularga ham boshqa shahardan uchadigan reysga chiptalar qilib berilmadi. Bugun Malayziya orqali uchishim mumkin edi. Lekin men professional sportchiman. Tavakkal qila olmayman.

Bangkokdan Toshkentga uchadigan navbatdagi reys seshanba kuni bo'ladi. Buzilgan samolyot o'rniga Toshkentdan boshqa havo layneri keladi deyishgandi. Bu ham amalga oshmadi. “Asian Fight” turnirida ishtirok etmayman va buning uchun muxlislar va tashkilotchilardan uzr so'rayman”, - dedi Boynazarov.