04 jan 09:47
Yangiliklar

Tennis

Brisbane International. Novak Jokovich 293-raketkaga yutqazdi

Dunyoning ettinchi raketkasi Novak Jokovich Avstraliyaning Brisben shahrida o'tkazilayotgan tennis turniridagi ishtirokini yakunladi.

Serbiyalik tajribali raketka ustasi Brisbane International turnirining 1/4 finalida ATP reytingida 293-pog'onada borayotgan amerikalik Reylli Opelkaga imkoniyatni boy berib qo'ydi - 6/7(6), 3/6. Bu tennischilarning o'zaro o'tkazgan ilk uchrashuvi bo'ldi.

Roppa-rosa 100 daqiqa davom etgan bahsda Jokovich 8, Opelka 16 ta eys zarbasini amalga oshirgan. Ikkala tennischi ham bittada qo'shxatoga yo'l qo'ygan. Bitta breyk Reylliga nomdor raqibi ustidan g'alaba keltirdi. Endi u 1/2 finalda Jovanni Mpetshi-Perrikarga qarshi kortga chiqadi. Francuz tennischisi 1/4 finalda chexiyalik Yakub Menshikdan ustun keldi - 7/5, 7/6(5).