Britaniyaning The Telegraph nashri O'zbekiston Prezidentining sog'lom turmush tarzini targ'ib qilish tashabbusi haqida yozdi

«Dunyo» AA xabar berishicha, maqola nashrning Markaziy Osiyo bo'yicha muxbiri Jeyms Kilner tomonidan yozilgan.

Materialda O'zbekiston Prezidenti SHavkat Mirziyoevning aholi o'rtasida sog'lom turmush tarzini qo'llab-quvvatlash bo'yicha yangi harakatni yaratish tashabbusi haqida so'z yuritilgan.

Muallif piyoda yurishni rag'batlantirish, ayniqsa, kuniga 10 ming qadam bosish g'oyasini mamnuniyat bilan qo'llab-quvvatlagan. U o'zbek oshxonasi o'zining ajoyib xususiyatlari, jumladan, betakror palov va somsa bilan mashhurligini takidlar ekan, ushbu taomlar kuchli kaloriyali bo'lgani sababli ovqatlanishdan keyin, albatta, jismoniy mashqlar, xususan piyoda yurish va kechki sayr inson sog'lig'i uchun foydadan xoli emasligini qayd etadi.

Jeyms Kilnerga ko'ra, davlatimiz rahbari aholi salomatligi haqida g'amxo'rlik qilib, ushbu g'oyani ilgari surdi. Bu koronavirus tarqalishi paytida juda dolzarb va o'zbekistonliklar orasida yangi fitnes-trendning boshlanishi bo'ldi.

Muallif Prezident SHavkat Mirziyoev odamlarni tuz, shakar va yog' miqdori yuqori bo'lgan taomlar, shuningdek, xamirli ovqatlar, shirinliklar va non mahsulotlari istemolini kamaytirishga chaqirganini takidlaydi. Prezident aholi o'rtasida to'g'ri ovqatlanish va sog'lom turmush tarzini har tomonlama targ'ib qilish va sport markazlari sonini ko'paytirish tashabbusini ilgari surdi.

«The Telegraph» - Buyuk Britaniyada 1855 yildan buyon nashr etilayotgan kundalik milliy gazetadir. Bosma nashr har kuni 318 ming nusxada chop etilmoqda. Gazeta Buyuk Britaniya va xorijiy mamlakatlarda tarqatiladi.