Bueno Silva Julianna Penyaga "vyzov" tashladi, sobiq UFC chempioni javobni uzoq kuttirmadi

Mayraning fikricha, aynan u Julianna Penyaga qarshi vakant bo'lib qolgan chempionlik kamari uchun jang qilishga haqli ekan. Bu vazndagi UFC chempionlik kamari Amanda Nunes tomonidan egasiz qoldirilgandi. 

"Rakelda men bilan jang qilish imkoniyati bor edi. Lekin buni istamadi. Demak, bu ishni biz Julianna bilan amalga oshirishimiz kerak. Men ham, Penya ham bunga haqlimiz. Olg'a, UFC!", - deya kechagi jangidan keyingi matbuot anjumanida keyingi rejalariga to'xtalgan Bueno Silva.

Sobiq UFC chempioni bu chorlovning javobini uzoq kuttirmadi. 

"Kimdir men haqimda gapirganini eshitib qoldim. Juda yaxshi, navbatga tur! Men sen bilan ham, Rakel bilan ham bir oqshomning o'zida hisob-kitob qilaman. Yana kim yuzi bejalgan holatga tushishini istaydi?", - deya o'zining ijtimoiy tarmoqdagi sahifasida xabar qoldirgan Penya. 

Jurnalistlar matbuot anjumani hali yakuniga etmasidan Bueno Silvaning chaqirig'iga Penya javob berib ulgurganini aytishdi. 

"U juda kulguli. Juliana, sen menga yoqasan. Lekin men seni va Rakelni bitta urinishda yirtib tashlayman. Rakel ikkimizning jangimizni solishtirib ko'r. Balki, shundan keyin ovozingni o'chirarsan, Julianna", - deya so'ziga yakun yasagan Silva.