Buxoroda maktab o'quvchilari o'rtasida voleybol musobaqasi o'tkazildi

Buxoro viloyati Peshku tumanidagi bolalar va o'smirlar sport maktabida “Sog'lom tanda – sog' aql” shiori ostida tashkil etilgan turnirda viloyat, shahar va tumanlardagi umumtalim maktablarining 200 nafarga yaqin sportsevar qizlari ishtirok etdi. Musobaqa yuqori saviyada, murosasiz bahslarga boy bo'ldi.

Turnirda ishtirokchilar yosh toifasiga qarab ikki guruhga bo'lingan holda g'oliblik uchun bahs olib bordi.

Yakuniy natijalarga ko'ra quyi guruhda Kogon tumani jamoasi faxrli 3-o'rinni qo'lga kiritgan bo'lsa, Qorako'l tumani jamoasi shohsupaning ikkinchi pog'onasini band etdi. Bu jamoa yosh voleybolchilari hal qiluvchi o'yinda Olot tumanidan kelgan tengdoshlariga imkoniyatni boy berdi.

Yuqori sinf o'quvchi qizlari o'rtasidagi qizg'in bahlardan so'ng final o'yiniga mezbon – Peshku hamda Buxoro shahri jamoalari etib kelishdi. Unda Buxoro shahri jamoasi g'alaba qozondi. 3-o'rin SHofirkon tumani voleybolchi qizlariga nasib etdi.

Musobaqa yakunida g'olib jamoalar tashkilotchilar tomonidan diplom va esdalik sovg'alari bilan taqdirlanishdi.