"Devis kubogi". Britaniya - O'zbekiston o'yinidagi mag'lubiyat uchun Lebed aybdormi? (Mulohaza)

Albatta, bizni kuchli terma jamoaga qarshi bahs kutib turardi. Oldindan ich-ichimdan 2:3 hisobidagi mag'lubiyat ham biz uchun yaxshi natija bo'ladi degan o'ylar xam yo'q emasdi hayolimda.

Musobaqaning birinchi kuni mamlakatimizning birinchi raketkasi Denis Istomin va mezbonlarning ikkinchi raketkasi Dani Evanslar kortga chiqishdi. Dani Evans hozir reytingda 218-o'rinda borayotgan bo'lsada, bir paytlar TOP100 ning doimiy azosi edi. Vaqtida ATP reytingida 41-o'ringacha ko'tarilgan. Jarohatlardan endigina qutulib olgan va asta-sekin jismoniy holatini yaxshilab borayotgan raqib Denis Istominni 5 setda 7-6(4), 4-6, 0-6, 6-4, 7-5 hisobida murosasiz bahsda mag'lubiyatga uchratdi. Ikkinchi uchrashuvda raqiblarning birinchi raqamli tennischisi Kemeron Norri bizning yosh tennischimiz Jo'rabek Karimovga qarshi kortga chiqdi. Jo'rabek Karimov raqibini 5 set davom etgan trillerda 0/6, 5/7, 7/6(6), 6/2, 6/2 xisobida enga oldi. Birinchi kungi 1:1 hisobi Istominning mag'lubiyatini umuman bildirmadi.

Ikkinchi kun tennischilar juftlik bahslarida kortga chiqishdi. Ochig'ini tan olish lozim, juftlikda bizda xech qanday imkoniyat yo'q ekanligini oldindan bilgandim. Raqiblarda ATPning juftlik reytingida doimiy TOP100 azosi Jeymi Marrey va hozirda juftlikda 23-o'rinda borayotgan Dominik Inglotlar borligi so'zlarimning yaqqol isboti edi. SHunday bo'lsada, terma jamoa sardori Petr Lebed uchrashuvni Istomin/Fayziev juftligiga ishonib topshirdi. Uchrashuv 4 setda 4/6, 7/6(8), 6/2, 6/3 xisobida raqiblar foydasiga hal bo'ldi. Ikkinchi kundan keyin 2:1 ko'rinishida raqiblar oldinga o'tib olishdi. Yutqazayotgan terma jamoamizdan ko'nglim to'q edi. CHunki musobaqaning hal qiluvchi uchinchi kuni rejaga ko'ra Denis Istomin birinchi bo'lib Kemeron Norriga qarshi, ulardan so'ng Jo'rabek Karimov raqiblarning ikkinchi raqamli tennischisi Dani Evansga qarshi kortga chiqishi kerak edi. Denis birinchi bahsda Norrini enga olsa, ana undan keyin xal qiluvchi beshinchi uchrashuvda Jo'rabek Karimov yana bir bor o'zini ko'rsata oladi degan umid bor edi...

Ertalabdan boshqa ishlarimni yig'ishtirib, kompyuter oldida(internetda) kunni o'tkazdim. Soat 16:00 bo'lishini sabrsizlik bilan kutardim. Axir terma jamoa pley-offda xar kuni ham o'ynayvermaydi. Uning ustiga "Sport" telekanali orqali jonli efirga uzatilmoqda. Hullas, hammasi yaxshi edi.

Mana shu erda katta sahnaga terma jamoa sardori Petr Lebed ko'tarildi. Uchrashuvlar boshlanishiga bir soatdan kam vaqt qolganida Norriga qarshi bahsga Istomin emas, balki Sanjar Fayziev chiqishi elon qilindi. Buni eshitib karaxt ahvolga tushgandim. Ichimda Istominni eski jarohatlari bezovta qilgandir degan xayollar o'tdi. Mayli, endi Jo'rabek yutgan raqibni Sanjar xam yutsa bo'ladi deb tinchlantirdim o'zimni. CHunki, Jo'rabek va Sanjar o'zaro o'ynagan vaziyatlarda shiddatli bahs kechardi. Afsuski, o'sha kuni Sanjar o'zini yo'qotib qo'ydi. "Emirates" arenasi uni butunlay yutib yubordi. Hamyurtimiz hech qanday qarshilik ko'rsata olmadi. Hisob xam shunga yarasha 6/2, 6/2, 6/0 ko'rinishini oldi. Beshinchi uchrashuvga hojat ham qolmadi...

SHahsiy xulosa: Bu erda 100% ayb terma jamoa sardori Petr Lebedda. Tushuntirib beraman!

Ikkinchi kungi juftlik bahslariga Istominni tushirib xato qildi. CHunki, raqib tarkibida ikki kuchli juftlik bahslari ustalari mavjud. Mag'lubiyatga uchrashimiz deyarli aniq edi. Denisning o'rnini bemalol Farrux Do'stov yoki Humoyun Sultonovlar egallashi mumkin edi. Mo'jiza ro'y beraman desa Petr Lebedni o'zi tushib o'ynasa xam ro'y beraveradi. SHunda Istomin uchinchi kungi yakkalik uchrashuviga charchoqsiz tayyor holatda etib borardi.

Bundan tashqari, Sanjar Fayziev o'yinga ruhan tayyor emasdi. Buni o'yinda ham ilg'ash qiyin emasdi. CHunki, Sanjarning o'zi oldindan faqat juftlik uchrashuviga tayyorgarlik ko'rgan. Yakkalik va juftlik uchrashuvlarini taqqoslasangiz uning o'yinida osmon bilan erchalik farq bor. Hayajon baribir o'z so'zini aytdi. Uchrashuvning ertasiga Sanjar ijtimoiy tarmoqlar orqali o'zining passiv o'yini uchun O'zbekiston ahlidan uzr so'radi.

Endi Denis Istominning jarohat yoki charchoq alomatlariga keladigan bo'lsak. Jarohat olgan yoki charchagan tennischi kortda o'yinni tomosha qilib o'tirmaydi. Istomin Fayzievning o'yinini yaxshi kayfiyatda arenada kuzatib o'tirdi. Uchrashuv yakunlangandan so'ng Glazgodan to'g'ri Rossiyaning Sankt-Peterburg (masofa 2064 km) shahriga ATP musobaqasida ishtirok etish uchun yo'l oldi. Oradan to'liq ikki kun ham o'tmasdan juftlikda qatnashib g'alabaga erishdi. Istomin jarohat olmagan. CHarchagan tennischi ham bunday qisqa vaqt ichida 2064 km masofani bosib o'tib, boshqa bir davlatdagi musobaqada ishtirok etishi xam aqlga sig'maydi. Menimcha bu erda murabbiy qo'pol xatoga yo'l qo'ydi.

Petr Lebed! Agar ushbu maqolani o'qiyotgan bo'lsangiz, mana shu vaziyatga, qilgan xatolaringiz uchun izoh berib o'tishingizni talab qilaman. Bunday qo'pol xatolar kechirilmasligi kerak. Kechirilsa raqobat, motivaciya bo'lmaydi, raqobat yo'q joyda o'sish bo'lmaydi. Biz tennisimizni yuksaklarga o'sishini istaymiz!

Husniddin Mirzaliev