Dunyoning 1-raketkasini mag'lub etgan Sobolenko Madridda chempion bo'ldi

Hal qiluvchi final uchrashuvida WTA reytingida 7-o'rinni egallab turgan belaruslik Arina Sobolenko dunyoning birinchi raqamli tennis malikasi, avstraliyalik Eshli Bartiga qarshi kortga chiqdi. Bir soatu 39 daqiqa davom etgan bahsda Arina nomdor raqibasini taslim eta oldi - 6/0, 3/6, 6/4.

Eshli uchrashuv davomida 3 ta, Arina esa 9 ta eys zarbasini amalga oshirdi. Tennischilarning o'zaro uchrashuvlaridagi hisob muvozanati tiklandi - 4:4. Mutua Madrid turniridagi muvaffaqiyatli ishtirok 315,160 evro mukofot puli hamda 1000 reyting ochkosini taqdim etdi. Barti esa bu turnirdan 188,280 evro va 650 ochko ishlab oldi.

Bu Sobolenkoning mavsumdagi ikkinchi, faoliyatidagi 10-sovrini bo'ldi. Arina ertaga elon qilinadigan yangi reytingda to'rtinchi raketkasiga aylanadi.