Dzyudo. Sobirov va Qurbonov bronza uchun kurashadilar

Musobaqaning so'nggi kunida -90 kg, -100 kg, +100 kg vazn toifalarida janglar o'tkazilmoqda.

- 90kg vazn toifasidagi musobaqalarda ishtirok etgan sportchimiz SHahzodbek Sobirov braziliyalik raqibini mag'lub etib, chorak finalga yo'l olgandi. Biroq, u ushbu bosqichda rossiyalik Stanislav Retinskiga yutqazib qo'ydi. Rossiyalik dzyudochi finalga yo'l olgani sabab SHahzodbekda bronza uchun imkoniyat saqlanib qoladi. U endi o'tish jangida slovakiyalik raqibini mag'lub etib, yarim finalda yutqazib qo'ygan dzyudochilardan biriga qarshi tatamiga chiqishi lozim.

Ushbu vazndagi boshqa bir sportchimiz Muhkammadkarim Hurramov esa shveciyalik raqibini mag'lub etgandi. Biroq, keyingi bosqichda vengriyalik sportchiga yutqazib qo'ydi. Muhammadkarim uchun Tbilisidagi turnir yakunlandi.

-100kg vazn toifasidagi dzyudochimiz ukrainalik Oleksandr Romanchukni mag'lubiyatga uchratdi. Ikkinchi jangida esa shveciyalik Martin Pachekka yutqazib qo'yib, turnirdan chiqib ketdi.

Ushbu vazndagi Soyib Qurbonov esa avvaliga mezbon sportchini mag'lubiyatga uchratdi. Keyin esa chorak finalda rossiyalik Kazbek Jankishievga yutqazib qo'ydi. Lekin, u ham raqibi finalga chiqqani sabab, bronza uchun kurashishi mumkin. Buning uchun u BAAdan tashrif buyurgan sportchini mag'lub etib, keyin yarim finalda yutqazgan dzyudochilardan biriga qarshi jang o'tkazadi.

Eng og'ir vazndagi dzyudochimiz Boltaboy Boltaev esa ilk jangidayoq rossiyalik raqibiga yutqazib qo'ydi.

O'tish va bronza uchun janglar kechki payt bo'lib o'tadi.