Dzyudochilarimiz "Tashkent Grand Slam" turnirining ikkinchi kunida uchta medal qo'lga kiritishdi. Reytingdagi o'rnimiz qanday?

Kun yakuniga ko'ra, vakillarimiz 2 ta kumush va 1 ta bronza medallariga ega bo'lishdi.

-73 kg vazn toifasida bronza medallari uchun "o'zbekcha derbi" guvohiga aylandik: SHahram Ahadov Obidxon No'monovdan ustun keldi va bronza medaliga sazovor bo'ldi. 

-70 kg vaznli hamyurtimiz SHirinjon Yo'ldosheva bronza uchun kechgan bahsda Xitoy Taypeyi vakilasi YU Jung Liaoga imkoniyatni boy berdi va musobaqani 5-o'rinda tugatdi. 

-70 kg vazn toifasida Xurshida Razzoqberdieva finalgacha etib bordi va hal qiluvchi bahsda yaponiyalik Rin Maedaga imkoniyatni boy berib, kumush medal sohibasiga aylandi.

-81 kg vaznli Muso Sobirov bronza uchun bahsda BAA sharafini himoya qilayotgan Gajimurad Omarovga yutqazdi - 5-o'rin.

-81 kg vazn toifasida Arslonbek Tojiev finalga qadar etib bordi va hal qiluvchi bahsda IJF nomidan bahslarda qatnashayotgan Timur Arbuzovga mag'lub bo'lib, kumush medal bilan kifoyalandi.

Kecha musobaqaning birinchi kunida polvonlarimiz 1 ta kumush va 4 ta bronza medalini qo'lga kiritgandilar.

SHu tariqa, ikki kun yakuniga ko'ra, O'zbekiston terma jamoasi 3 ta kumush va 5 ta bronza medaliga ega bo'lib turibdilar. Ertaga, 2 mart kuni musobaqaning so'nggi kun bellashuvlari o'tkaziladi va unda og'ir vaznli dzyudochilar medallar uchun kurashishadi. 

Medallar jamg'arish reytingida dzyudo vatani Yaponiya terma jamoasi peshqadamlikni qo'lga olgan. O'zbekiston terma jamoasi esa ikkinchi o'ringa joylashgan. Ispaniya esa uchinchi o'rinni band etgan.