Dzyudochimiz yoshlar o'rtasidagi jahon chempionatida kumush medalini qo'lga kiritdi

Jahon chempionatining dastlabki kunida -50 kg vazn toifasida tatamiga chiqqan hamyurtimiz Maqsud Ochilov finalga qadar avstraliyalik Keyn Styuart, vengriyalik Fechko Sanad, turkiyalik Ejder Toktaylar ustidan zafar quchib, jahon chempionligi hal bo'ladigan bahsga qadar etib keldi. 

Hal qiluvchi bellashuvda esa hamyurtimizga braziliyalik dzyudochi Aldi de Oliveyra raqib bo'ldi. Keskin kurashlar ostida o'tgan mazkur qarama qarshilik Oliveyra foydasiga hal bo'ldi va braziliklik sportchi jahon chempioniga aylandi. Maqsud Ochilov esa kumush medali bilan cheklandi. Muhimi sportchilarimiz jahon chempionatining ilk kunida kumush medalini qo'lga kiritib, musobaqani ko'tarinki kayfiyatda boshlab olishdi. Asosiy kurashlar esa hali oldinda.

Ushbu yosh toifasidagi jahon chempionati beshinchi marotaba tashkil etilayotgan bo'lib, uning birinchisiga 2009 yilda Vengriya poytaxti Budapesht shahri mezbonlik qilgan, keyingi uch jahon chempionatlari Kiev (2011 y.), Mayami (2013 y.) va Saraevo (2015 y.) shaharlarida bo'lib o'tgan. Yoshlar o'rtasidagi V jahon chempionatini esa guvohi bo'lganingizdek Santyago shahri o'zida qabul qilmoqda. Ana shu tariqa dzyudo bo'yicha yoshlar o'rtasidagi jahon chempionati ilk marotaba Janubiy Amerika qitasiga, hususan CHili davlatiga etib keldi.

Bugun qizlar o'rtasida -48 kg. va -52 kg. vazn toifalarida bellashuvlar o'tkazilsa, yigitlar -60 kg. va -66 kg. vazn toifalarida tatamiga chiqishadi. Eslatib o'tamiz, musobaqa 13 avgustga qadar davom etadi.