Elina Svitolina 0/6 hisobidan chiqib ketdi

Dunyoning 22-raketkasi Elina Svitolina ilk davrada irodali g'alabaga erishdi. Ukrainalik tennis malikasi WTA reytingida 34-pog'onada borayotgan chexiyalik Marketa Vondroushovaga birinchi setni "suxoy" hisobda yutqazgan bo'lsa-da, yakunda g'alabani o'z tomoniga og'dira oldi - 0/6, 6/2, 7/5.

Svitolina bu g'alabasi evaziga tennischilarning o'zaro uchrashuvlari hisobida ham oldinga chiqib olishga muvaffaq bo'ldi - 4:3. Bir soatu 55 daqiqa davom etgan bahsda Svitolina 1, Vondroushova 6 ta eys zarbasini amalga oshirdi. Qo'shxatolar Elinada bittaga ko'proq bo'ldi - 5 ga 4. Ikkala tennischi ham 5 tadan breyk-poyntdan unumli foydalanishdi. 

Endi Svitolina ikkinchi davrada amerikalik Jessika Pegulaga qarshi kortga chiqadi. Birinchi davraning yana bir qiziqarli uchrashuvida tunislik Ons Jaber amerikalik Makkartni Kesslerdan 6/2, 6/0 ustun kelgan bo'lsa, ukrainalik Dayana Yastremskaya AQSH vakilasi Peyton Stirnsga kutilmaganda yutqazib qo'ydi - 5/7, 3/6.