Eshitdik-da! Ravshan Ermatov - MOQ raisining birinchi o'rinbosari

Bugun biroz avval Termizda kurash bo'yicha Prezident sovrini uchun Al-Hakim- At-Termiziy xalqaro turniri starti oldidan o'tkazilgan anjumanda moderatorlik vazifasini bajargan Xalqaro press klub raisi SHerzod Qudratxo'jaev ham Ravshan Ermatovni MOQ raisi o'rinbosari deb tanishtirgan.     

Xabaringiz bor, O'zbekiston jismoniy tarbiya va sport vazirligi tugatilib, uning o'rnida O'zbekiston Respublikasi turizm va sport vazirligi tashkil etildi. Prezident farmoni bilan yangi vazirlikka Bosh vazir o'rinbosari Aziz Abduqahhorovich Abduhakimov tayinlanadi. Ulug'bek Azamov turizm va sport vazirining birinchi o'rinbosari, Abdulaziz Aqqulov, Avazjon Karimov va Zarif Kazakovlar vazir o'rinbosarlari lavozimlariga tayinlanadi.

Avazjon Karimov shu kungacha O'zbekiston jismoniy tarbiya va sport vaziri o'rinbosari lavozimida ishlab kelayotgandi. Demak, bu mutaxassis nomi o'zgartirilgan vazirlikdagi faoliyatini davom ettiradi. Ro'yxatda Ermatovning ism-sharifi keltirilmagan va u tez orada rasman Milliy olimpiya qo'mitasi raisi Rustam SHoabdurahmonovning birinchi o'rinbosari sifatida ish boshlaydi.   

Bizga xabar berishlaricha, kelayotgan yangi haftada MOQda tashkil etiladigan Assambleya yig'ilishida Ravshan Ermatov keng sport jamoatchiligiga rasman tanishtiriladi. Ermatov parallel ravishda O'zbekiston futbol associaciyasi birinchi vice-prezidenti lavozimida ham faoliyatini davom ettiradi.