Germaniyada Prezident sovrini uchun o'tkazilgan xalqaro turnir muhokama qilindi FOTOGALEREYA

Anjumanda ishtirok etgan sportni rivojlantirish vaziri Adham Ikromov, O'zbekiston kurash federaciyasi raisining birinchi o'rinbosari, zamonaviy kurash qonun-qoidalari muallifi Komil Yusupov, Milliy Olimpiya qo'mitasi vakili Kamol Usmonov, mazkur xalqaro turnirda kumush medal sohibi bo'lgan hamyurtimiz SHohrux Usmonov va boshqalar Germaniyada o'tgan kurash musobaqalarining milliy qadriyatlarimiz targ'ibotidagi ahamiyati, Yangi O'zbekiston tamoyilining xalqaro maydondagi obro'-etibori, ota-bobolarimizdan meros kurash sportini jahon bo'ylab ommalashishida o'tkaziladigan turnirlarning o'rni xususida to'xtalib o'tishdi.

Malumki, Germaniyada mukofot jamg'armasi 10 ming evro bo'lgan xalqaro turnirda Evropaning 20 dan ziyod davlatidan polvonlar ishtirok etib, erkaklar +81 kg. vazn toifasida, ayollar +63 kg. vaznda kurashdi.

Musobaqaning qizlar bahsida polshalik Sandra Liskin g'olib chiqqan bo'lsa, o'g'il bolalar o'rtasidagi musobaqada serbiyalik Aleksandr Kolobik O'zbekiston Respublikasi Prezidenti sovrinini qo'lga kiritdi.

Frankfurt-Mayn shahridagi bahslarda 1-o'rinni egallagan sportchilar 2500, 2-o'rin sohiblari 1500 va 3-o'rindan joy olgan kurashchilar 500 evro miqdoridagi pul mukofotlari bilan taqdirlangan edi.

Takidlanishicha, 28-29 may kunlari Bolgariyada, 25-26 iyun kunlari Turkiyada hamda iyul oyida Franciyada kurash bo'yicha O'zbekiston Respublikasi Prezidenti sovrini uchun xalqaro turnirlar o'tkazilishi rejalashtirilmoqda.

Alimurod MAMADAMINOV, o'z muxbirimiz