“Ichan qala”da etnosport festivali bo'lib o'tadi

Kuni kecha Xiva shahriga turkiyalik mehmonlar tashrif buyurib, mazkur festivalga tayyorgarlik jarayoni bilan tanishishdi. O'z navbatida shaharning qadimiy obidalaridan biri - Nurullaboy majmuasida tashkil etilgan matbuot anjumanida ishtirok qilishdi. 

Xususan, mazkur tadbirda Xorazm viloyati hokimi Farhod Ermanov, O'zbekiston Respublikasi Innovacion rivojlanish vaziri o'rinbosari Oybek Norinboev, O'zbekiston kamondan otish federaciyasi raisi Otabek Imamov, Butunjahon etnosport Konfederaciyasi prezidenti Najmiddin Bilol Erdog'an, Turkiya o'qchilar vaqfi rahbari Haydarali Ildiz qatnashdi.  

Binobarin, matbuot anjumanida ilk bor uyushtirilayotgan mazkur etnosport festivali kamondan otish musobaqalari va milliy o'yinlardan tashkil topganligi, ishtirokchilarining yoshi chegaralanmaganligi va unda ming nafardan oshiq sportchining qatnashishi takidlandi. Festivalni o'tkazishdan ko'zlangan asosiy maqsad esa yo'qolib borayotgan milliy o'yinlarni qayta tiklash va ularni kelgusi avlodlarga etkazishga qaratilgan.

Matbuot anjumani chog'ida ommaviy axborot vositalari  xodimlari o'zlarini qiziqtirgan savollarga ham javoblar olishdi.

Ikrom XUDOYBERGANOV, Xiva shahridan

Suratlar Xorazm viloyati hokimligi matbuot xizmati tomonidan taqdim etildi