Ikki yunon-rum kurashchimiz Parij-2024 Olimpiadasi licenziyasi uchun gilamga chiqadi

Bugun yunon-rum kurashi bo'yicha Parij-2024 Olimpiadasi licenziyalari uchun bellashuvlar bo'lib o'tyapti. Biroz avval saralash bahslari yakunlanib, 1/2 finalda olimpiya o'yinlari licenziyalari uchun gilamga chiqadigan juftliklar aniq bo'ldi. Klassiklarimizdan Jalgasbay Berdimuratov (87 kg) va Rustam Assakalov (97 kg) kechki dasturda Parij-2024 yo'llanmalari uchun kurashishadi. 

Osiyo o'yinlari g'olibi bo'lgan Jalgasbay Berdimuratov 1/4 finalda hindistonlik Kumar Sunilni 4-2 hisobida mag'lubiyatga uchratdi. Uning Olimpiada chiptasi uchun kechadigan 1/2 finaldagi raqibi eronlik Alireza Mohmadipiani bo'ladi. Alireza 1/4 finalda qirg'izistonlik Asan Janishovdan 6-3 hisobida ustun keldi. 

Eng tajribali yunon-rum kurashchimiz Rustam Assakalov esa 1/4 finalda yaponiyalik Yuri Nakazatoni 9-0 hisobida taslim etdi. Endi u Olimpiada licenziyasi uchun mezbonlar vakili Jusupbekovga qarshi bahs olib boradi. Jusupbekov 1/4 finalda hindistonlik Niteshni muddatidan avval 10-0 hisobida engdi.       

Qolgan yunon-rum kurashchilarimiz Abror Atabaev (67 kg) 1/4 finalda qozog'istonlik Meyirjan SHermaxanbetga 3-6, Timur Nasimov (130 kg) 1/4 final bahsida yaponiyalik Sota Okumura 6-12 hisobida imkoniyatni boy berib, musobaqadagi ishtirokini erta yakunladi.

Licenziya uchun kechadigan 1/2 final juftliklari:

87 kg: Jalgasbay Berdimuratov - Alireza Mohmadipiani (Eron)

97 kg: Rustam Assakalov - Jusupbekov (Qirg'iziston)

O'tgan yili Serbiya poytaxti Belgrad shahrida o'tgan jahon chempionatida klassiklarimizdan Islomjon Bahromov (-60 kg) va Aram Vardanyan (-77 kg) Parij-2024 Olimpiadasi licenziyasini qo'lga kiritgan edi.