Ishchi guruh Navoiy viloyatining sport infratuzilmasini o'rganmoqda

Vazirlar Mahkamasining Sport va turizmni rivojlantirish masalalari kotibiyati Bosh mutaxassisi, Ishchi guruh rahbari Z.Tadjibaev, Jismoniy tarbiya va sport vazirining o'rinbosari A.Karimov, MOQ raisi o'rinbosari SH.Tashmatovlardan iborat guruh hozirda Navoiy viloyatining bir qator hududlarini o'rganib chiqishmoqda.

Navoiy mamlakatimizda hududi jihatdan eng katta, iqtisodiy salohiyati yuqori, biroq aholi soni jihatdan pastki o'rinlarda turuvchi hudud hisoblanadi. Mutasaddilar o'rganishlar davomida bu kabi jihatlarga ham alohida etibor qaratib o'tishmoqda. Boisi sport bilan shug'ullanuvchi yoshlar bazi hududlarda uylaridan mashg'ulot zaligacha bir necha kilometr masofalarni bosib o'tishi kerak. Viloyat hokimligi, Jismoniy tarbiya va sport boshqarmasi mutasaddilari aholiga qulaylik yaratish maqsadida o'sha hududlar uchun eng qulay nuqtalarda yangi, zamonaviy sport inshootlarini qurish, mavjudlarini tamirlash kabi masalalarni ko'rib chiqishmoqda.

Ayni paytda ishchi guruh azolari Navoiy shahridan tashqari viloyatning Qiziltepa, Tomdi tumanlarida ham bo'lishib, ushbu hududlarda sport bilan shug'ullanuvchilar uchun yaratilgan sharoitlar, mavjud sport obektlari haqida o'rganishlar olib borishmoqda. Rejaga ko'ra, safar davomida viloyatning chekka hududlariga borish, u erlardagi vaziyat bilan ham yaqindan tanishish ko'zda tutilgan.