Isroil Gran-prisining ikkinchi kuni ham medal bo'lmadi

-70 kg vazndagi dzyudochi qizimiz Gulnoza Matniyazovaning ikkinchi uchrashuvini o'tkazgani va yarim final yo'llanmasi uchun kechgan bahsda shveciyalik Anna Bernxolmga imkoniyatni boy berib qo'ygani haqida xabar bergan edik.

Hozirgina Gulnoza bronza medali uchun kechgan bahslarning dastlabkisida irlandiyalik Megan Fletcherga yutqazib qo'ydi va ettinchi o'rin bilan kifoyalandi. Endi aynan Megan bronza medali uchun daniyalik Emilie Sukka qarshi tatamiga chiqadi.

SHu tariqa, o'zbekistonlik sportchilarning bugungi ishtiroki o'z yakuniga etdi. Afsuski, bugun ham dzyudochilarimiz kunni medalsiz yakunlashdi. Isroil Gran-prisi joriy yil hisobidan ilk xalqaro turnir bo'lgani uchun ham dzyudochilarimizning natijalari murabbiylarimiz kutganchalik bo'lmayapti.

Garchi bugun Gulnoza Matniyazova medalsiz qolgan bo'lsa-da, Tokio-2020 Olimpiadasi uchun muhim hisoblangan 182 reyting ochkosini qo'lga kiritdi. G'iyosjon Boboev esa 112 ochkoga ega bo'ldi.

O'zbekiston dzyudo federaciyasi matbuot xizmati