Isroil Madrimov Xorazm sport boshqarmasida bo'ldi

Ayni damda, u  havaskorlar o'rtasida Osiyo chempionati va Osiyo o'yinlari oltin medali sohibi, qator xalqaro turnirlar g'olibi va sovrindori, qolaversa, professional boks olamining WBA inter-continental kamari egasi hisoblanadi. 

Endilikda, bokschimiz IBF va WBA talqinlari bo'yicha jahon chempioni Jeyson Rosarioga qarshi jangga hozirlik ko'rmoqda. Buning barobarida, Yaponiyaning Tokio shahrida bo'lib o'tadigan yozgi Olimpiada o'yinlari licenziyasini qo'lga kiritish ishtiyoqida musobaqalarga qizg'in tayyorlanyapti.

Isroil Madrimov karantin davrida uyida bo'lib turgandi. Fursatdan foydalanib, u bir necha kun avval o'zining birinchi treneri Bahrom Quryozov bilan Xorazm viloyati jismoniy tarbiya va sport boshqarmasiga tashrif buyurib, u erda boshqarma boshlig'i vazifasini vaqtincha bajaruvchi Artik Palvanov bilan uchrashdi.

O'zaro suhbat chog'ida professional bokschimiz uy sharoitida trenerlari tomonidan berilayotgan maxsus dastur asosida yakka tartibda o'tkazayotgan mashg'ulotlar jarayoni, kelgusi rejalari va maqsadlari haqida  so'zlab berdi. 

O'z navbatida voha sporti rahbari  taniqli bokschimizga kelgusida ham o'zbek sporti  dovrug'ini yanada baland ko'tarishiga tilak bildirdi.

Ikrom  XUDOYBERGANOV.