Kamoliddin Mutalov: Ayollar boksida kelajak uchun poydevor qo'yilmoqda

Avvalroq, terma jamoamiz katta murabbiyi Hamid Tangribergenovning musobaqa oldidan fikrlarini etiboringizga havola qilgandik. O'zbekiston boks federaciyasi matbuot xizmati bugun qizlar terma jamoasi murabbiyi Kamoliddin Mutalovning fikrlarini taqdim etadi. 

"Osiyo chempionati qurasi biz uchun omadli keldi deya olaman. CHunki, qizlarimiz bittadan jang o'tkazib, g'alaba qozonishsa yarim final yo'llanmasini qo'lga kiritishadi. Bu - medal bor degani. Biz bu bilan to'xtab qolmaymiz va yuqori marralarni ko'zlaymiz. Xudo xohlasa bu chempionatdan medalsiz qaytmaymiz. O'zbekiston terma jamoasi umumjamoa hisobida birinchi o'rinni oladi degan umiddaman. 

Hozircha -64 kg vaznli bokschi qizimiz Dilfuza Bekovada medal naqd. U quraga ko'ra, to'g'ridan-to'g'ri yarim finalda ishtirok etadigan bo'ldi. Ammo, men buni medal deb hisoblamayman. Medal g'alaba orqali qo'lga kiritilishi lozim. Bu vaziyatda ushbu medal - qog'ozdagi medal. U g'alaba orqali keyingi bosqichlarga chiqishi kerak. Qizlarimizga omad tilayman, ular jismoniy va ruxiy tomonlama musobaqaga tayyor. 

Yigitlarimiz bizni g'alabalarga o'rgatib qo'yishdi. O'zbek bokschilari jahonda birinchi. Qizlarimiz ham shunday saviyaga chiqib olishlari kerak. 

Bungacha O'zbekistonda asosan erkaklar boksiga etibor qaratib kelingan. Yaqin vaqtlardan boshlab mamlakatimizda ayollar boksiga ham etibor berila boshlandi. O'ylaymanki, hozirgi yosh bokschi qizlarimiz avvalgi avlodga nisbatan texnik tomonlama ustunlar. Hozirda qizlarimiz o'smir qizlar o'rtasida ham, yoshlar o'rtasidagi bahslarda ham toblanishmoqda. Bu albatta vaqti kelib o'z mevasini beradi. Hozirda 17-18 yoshli qizlar vaqti kelib kattalar toifasida jang qila boshlashsa, ulardan ko'p narsa kutishimiz mumkin.

Bir oy oldin O'zbekiston ayollar terma jamoasi azolari bilan birga Ulan-Udedagi jahon chempionatida ishtirok etdim. Avvallari bokschi qizlarimiz ilk janglardayoq mag'lubiyatga uchrab, musobaqani tark etishardi. Bu safar garchi medal qo'lga kirita olmagan bo'lsakda, g'alabali janglarimiz bo'ldi. Natija o'z-o'zidan kelib qolmaydi. Hozirda kelajak uchun poydevor qo'yilmoqda", - dedi Kamoliddin Mutalov.

O'zbekiston boks federaciyasi matbuot xizmati (Ulan-Bator shahridan)