Kori Goff WTA Yakuniy turniri pley-off bosqichiga yo'l oldi

Amerikalik iqtidor egasi guruh bosqichining uchinchi uchrashuvida WTA reytingida oltinchi o'rinni egallab turgan chexiyalik Marketa Vondroushova ustidan 5/7, 7/6(4), 6/3 hisoblaridagi irodali g'alabaga erishdi. Uchchala uchrashuvda mag'lubiyatga uchragan chexiyalik tennis malikasi musobaqa bilan guruh bosqichidayoq xayrlashdi. 

Tennischilarning o'zaro uchrashuvlaridagi hisob yiriklashdi - 3:0. Ikki soatu 33 daqiqa davom etgan bahsda Kori oz emas, ko'p emas, 17 ta qo'shxatoga yo'l qo'ygan. Marketada bu ko'rsatkich 5 tani tashkil qildi. Vondroushova 2, Goff 3 ta eys zarbasini amalga oshirgan. Breyklar soni amerikalik tennischida bittaga ko'proq bo'ldi - 8 ga 7!