Kutib oling! O'zbekistonga TEKBOL sport turi kirib kelmoqda

SHu yilning o'zidayoq O'zbekiston chempionati bahslarining o'tkazilishi rejalashtirilmoqda. 

SHu o'rinda tekbol sport turi haqida malumot berib o'tamiz. Tekbolga 2014 yilda vengriyaliklar - sobiq professional futbolchi Gabor Borshani hamda kompyuter dasturchisi Viktor Xusar tomonidan asos solingan. Tekbol o'zida stol tennisi va futbol sport turlarini mujassamlagan. Sodda tilda aytganda, futbol va stol tennisi qorishmasi.    

To'pni birgina qo'l bilan o'ynab bo'lmaydi. Inson tanasining qolgan barcha azolari bilan to'pga teginish mumkin. Faqat to'pga ketma-ket tananing bitta azosi bilan zarba berilishiga ruxsat etilmaydi. Maqsad to'pni raqib tomon maydonchasiga tushirish. Javob qaytara olmagan taqdirda zarba yo'llagan jamoaga ochko yoziladi, xuddi stol tennisiga o'xshab. 

Tarix uchun juda ham qisqa fursat - 6 yil mobaynida tekbol yaxshigina mashhurlik va ommaviylikka erishdi. Bugungi kunda tekbol Lionel Messi, Neymar, Alison, Ronaldino, Luish Figu, Simao Sabroza, Rober Pires, SHon Garne singari mashhur futbol yulduzlarining kundalik mashg'ulotiga aylangan. «Ayaks», «Arsenal», «CHelsi», «Flamengo», «Pari-Sen-Jermen», «Real» kabi klublar tekbolni o'z mashg'ulotlariga kiritishgan. 

Dunyo miqyosida qisqa fursatda ana shunday etirofga erishgan tekbol tez orada O'zbekistonga ham kirib keladi. Rasmiy federaciya faoliyati yo'lga qo'yiladi va albatta chempionat bahslariga ham start beriladi.