Namanganda universal jang bo'yicha jahon chempionati o'tkazildi

Jumladan, Yangi Namangan tumanida joylashgan “Pahlavon” sport majmuasida tashkil etilgan universal jang bo'yicha jahon chempionatida o'smirlar va kattalar ishtirok etdi.

Mazkur musobaqada Qirg'iz Respublikasi, Qozog'iston, Rossiya Federaciyasi, Tojikiston, Armaniston, Zambiya singari dunyoning yigirmaga yaqin davlatidan besh yuzga yaqin sportchilar g'oliblik uchun tatamiga chiqdi. 

Jahon chempionatida O'zbekiston sharafini himoya qilgan namanganlik sportchilar mahorat va chaqqonlik bobida raqiblaridan qolishmagan holda munosib ishtirok etib, salmoqli muvaffaqiyatlarni qo'lga kiritdi.  

Xususan, Namangan shahri sport maktabi tarbiyalanuvchilari Hojiakbar Isroilov, Azizbek Boltaboev, Yangiqo'rg'on tumani sport maktabi vakili Lola Abdusattorova barcha raqiblarini engib, jahon chempioni unvoniga sazovor bo'ldi.  

Jahon chempionatining barcha g'olib va sovrindorlari Respublika sport vazirligi hamda Namangan viloyati hokimligi tomonidan munosib taqdirlandi.