O'smirlar Olimpiadasi sovrindori ananaga ko'ra MOQning esdalik sovg'asi bilan taqdirlandi

Uning medali O'zbekiston terma jamoasi uchun Buenos-Ayresdagi musobaqada dastlabkisi bo'ldi. Taqdirlash marosimidan so'ng Olimpiya shaharchasida o'ziga xos kichik yig'ilish tashkil qilindi. Milliy olimpiya qo'mitasi vakillari g'olib sportchi va uning murabbiyini tabriklashdi. 

Ushbu tadbirda Milliy olimpiya qo'mitasi Bosh kotibi Jasur Matchanov ham ishtirok etdi.

«Oltin medal uchun biroz omad etishmadi. Ammo musobaqaning birinchi kunidayoq medal qo'lga kirita olganimizdan xursandmiz. Umid qilamizki, bundan keyin medallarimiz soni yanada ko'payadi va yuqori natijalar bilan O'zbekiston xalqini xursand qilamiz», – dedi Bosh kotib.

SHundan so'ng Jasur Matchanov ananaga ko'ra sportchimizga O'zbekiston Milliy olimpiya qo'mitasi logotipi tushirilgan maxsus eksklyuziv soatni esdalik sovg'asi sifatida taqdim etdi.

So'ngra ishchi guruh yig'ilishi bo'lib o'tdi va unda tashkiliy masalalar, oldinda kutilayotgan musobaqalar, bajariladigan topshiriqlar muhokama qilindi.