O'zbekiston dzyudo federaciyasi TerDU bilan hamkorlikni yo'lga qo'yadi

Kuni kecha hamkor oliy o'quv yurtlari soni yana bittaga ko'paydi - 72 yillik tarixga ega Termiz Davlat Universiteti (TerDU)! SHu munosabat bilan bevosita Termiz shahrida uchrashuv tashkil etildi. Unda O'zbekiston dzyudo federaciyasi raisi Zafar Qahramonov, Federaciyaning viloyatlar bilan ishlash bo'limi boshlig'i Baxtiyor Yuldashev, Federaciyaning Surxondaryo viloyati bo'limi raisi To'lqin Valiev, Universitet rektori Abduqodir Toshqulov, prorektorlar hamda sport talimiga masullar ishtirok etishdi.

Malumot uchun, 1954 yilda tashkil etilgan Termiz Davlat Uniersitetida 13 ta fakultet bo'lib, bugungi kunda 22 114 nafar talaba tahsil olmoqda. Ulardan 4000 nafari muntazam sport bilan shug'ullanadi. Dzyudo bo'limidagi talabalar soni 100 nafarga yaqin. Hozirda Universitet tomonidan tog'li Boysun tumanida "Darband" sport bazasi bunyod etilmoqda. Bu maskan foydalanishga topshirilgach, dzyudochilar o'quv-mashg'ulot yig'inlarini o'tkazish imkoniga ega bo'ladilar.

Malumot uchun, Surxondaryo viloyatida Prezident Qarori bilan tashkil etilgan Respublikamizdagi ikkita Dzyudo mahorat maktabidan biri (Denov) faoliyat yuritmoqda. Yaponiyalik murabbiy Junna Kikuchi surxondaryolik yosh dzyudochilar bilan birga samarali ishlab kelyapti.

Universitetda bo'lib o'tgan uchrashuvda hamkorlikni yangi bosqichga olib chiqish masalalari muhokama qilindi va tez kunda ana shu barcha yo'nalishlarni o'z ichiga olgan Memorandum imzolanadi.