13 iyu 10:10
Yangiliklar

Boshqalar

O'zbekiston motokross terma jamoasi xalqaro musobaqa sovrindori

10-11 iyun kunlari Rossiya Federaciyasining Krasnodar o'lkasidagi Qora dengiz sohilida joylashgan mototrassada 15 davlat sportchilari o'rtasida motokross bo'yicha “Winline Hamdo‘stlik Kubogi – 2023” xalqaro musobaqasi bo'lib o'tdi.

Rossiya, Armaniston, Belarus, Janubiy Osetiya, Qozog'iston, O'zbekiston, Qirg'iziston, Tojikiston, Ozarbayjon, Mo'g'uliston, Janubiy Koreya, Xitoy, Hindiston, Turkiya va Italiyaning ko'zga ko'ringan motokrosschilari 65 kub sm, 85 kub sm, 125 kub sm (ayollar, yoshlar), “MX1”, “MX2” va “MX Open” sinflarida bellashdilar.

Aytish mumkinki, ushbu nufuzli musobaqani ikki kun davomida butun dunyo bo'ylab ekstremal sport muxlislari katta qiziqish va hayajon bilan kuzatdilar.

Quvonarlisi, xalqaro kubok musobaqasida O'zbekiston Respublikasi mudofaasiga ko'maklashuvchi “Vatanparvar” tashkiloti sportchilaridan iborat O'zbekiston milliy terma jamoasi azolari – Emran Ablyazov 125 kub sm (“MX2”), Jasur Samatov 250 kub sm (“MX1”) va Konstantin Sichyov “MX Open” sinflarida qatnashib, umumjamoa hisobida faxrli uchinchi o'rinni egalladilar.

Birinchi o'rin Rossiya, ikkinchi o'rin esa Qozog'iston terma jamoalariga nasib etdi. G'oliblar va sovrindorlar tashkilotchilarning belgilangan pul mukofotlari, medallari va esdalik sovg'alari bilan taqdirlandilar.