O'zbekiston velosiped sporti federaciyasida 2021 yil rejalari muhokama qilindi

SHu bois mavsum oldida turgan rejalar, Olimpiya yilida qilinadigan ishlar, yurtimizda velosiped sporti turlarini yanada rivojlantirish va ushbu sport bilan shug'ullanuvchilar sonini ko'paytirish, sportchilarimizni yirik musobaqalarga tayyorlash kabi masalalarga bag'ishlangan yig'ilish bo'lib o'tdi.

O'zbekiston velosiped sporti federaciyada bo'lib o'tgan yig'ilishni federaciya bosh kotibi Kozim O'rinboyxo'jaev olib bordi. Unda terma jamoamiz murabbiylar shtabi, federaciya xodimlari ishtirok etgan bo'lishsa, viloyatlar bo'limlari onlayn platforma orqali yig'ilishni kuzatib borishdi.

Kozim O'rinboyxo'jaev dastavval ortda qolgan 2020 yilda amalga oshirilgan ishlar bo'yicha qisqacha to'xtalib, karantin cheklovlari kuchaytirilgan davrda ham faoliyat olib borgan mutasaddilarga tashakkur aytib o'tdi. SHundan so'ng kun tartibidagi asosiy masalalarga to'xtalib o'tdi. 

Unga ko'ra, Respublikamizda faoliyat olib borayotgan trenerlar malakasini oshirish, yangi tashkil qilinadigan VMX yo'nalishi bo'yicha maxsus bo'limlar ochish va unga malakali mutaxassislarni jalb qilish, viloyat federaciyalarning moddiy-texnik bazasini mustahkamlash, Respublikamiz bo'ylab xalqaro velopoygalar tashkil qilish, asosiysi Tokio Olimpiadasiga yo'llanma olgan 2 nafar sportchilarimiz Olga Zabelinskaya hamda Murodjon Xolmurodovlarni 4 yillikning nufuzli musobaqasiga puxta tayyorlash kabi mavzular atroflicha muhokama qilindi.