Qishki Olimpiada. O'zbekiston sport delegaciyasi Janubiy Koreyaga etib bordi

Koreyada delegaciyamizni tashkiliy qo'mita vakillari va bir guruh o'zbekistonlik sport muxlislari kutib oldilar. 

Ertaga, 8 fevral kuni Milliy olimpiya qo'mitasi Prezidenti Umid Ahmadjonov boshchiligidagi mamlakatimiz sport delegaciyasi Olimpiya shaharchasida O'zbekiston Respublikasining davlat  bayrog'ini ko'tarish rasmiy marosimida ishtirok etadi. 9 fevral kuni esa Pxenchxanda XXIII qishki Olimpiadaning tantanali ochilish marosimi o'tkaziladi. Mazkur tadbirda ham MOQ Prezidenti bevosita qatnashadi.

Figurali uchish bo'yicha O'zbekiston terma jamoasi azosi Misha Ge ayni paytda AQSHda o'quv-mashg'ulot yig'inlarini davom ettirayotgani sababli, Janubiy Koreyaga 11 fevral kuni etib boradi. U 16 fevral kuni “Gangneung Ice Arena” muz saroyida figurali uchishning qisqa dasturida chiqish qilsa, 17 fevralda erkin dasturda o'z omadini sinab ko'radi. 

Komiljon To'xtaev 18 fevral kuni tog' chang'isining gigant slalom bahslarida ishtirok etadi. 22 fevralda esa slalom bo'yicha musobaqada qatnashadi. Tog' chang'isi bo'yicha bellashuvlar “Yongpyong Alpine Centre” majmuasida bo'lib o'tadi. 

Qayd etib o'tishimiz lozimki, qishki Olimpiya o'yinlarida sportchilarimizdan tashqari hakamimiz ham ishtirok etadi. Figurali uchish bo'yicha Xalqaro toifadagi hakam Saodat Numanova o'yinlarda hakamlik vazifasini bajaradi.

Milliy Olimpiya qo'mitasi mazkur o'yinlarda ishtirok etadigan vakillarimizga omad tilaydi!