Ravshan Ermatov Qashqadaryo viloyati jismoniy tarbiya va sport boshqarmasining yangi binosi ochilish marosimida ishtirok etdi

Joriy yilning 21 fevral kuni Qashqadaryo viloyati Qarshi shahrida Prezidentimiz tomonidan ilgari surilgan 5 muhim tashabbusning ikkinchi yo'nalishi ijrosini taminlash, jismoniy tarbiya va ommaviy sportni yanada rivojlantirish va takomillashtirish maqsadida, Qashqadaryo viloyati Jismoniy tarbiya va sport boshqarmasiga yangi bino foydalanishga topshirildi.

Mazkur binoning ochilish marosimida O'zbekiston Respublikasi Jismoniy tarbiya va sport vazirining birinchi o'rinbosari Ravshan Ermatov, Qashqadaryo viloyat hokimi Zoyir Mirzaev hamda boshqa mutasaddilar ishtirok etdi.

Ochilish marosimi Qashqadaryolik sportchilar uchun katta bayram sayliga aylanib ketdi desak mubolag'a bo'lmaydi. Sababi, marosim davomida 126 nafar umumtalim maktablarining jismoniy tarbiya o'qituvchilariga trener-instruktorlik qilish uchun sertifikat va 26 ta sport talim muassasalariga Muhtaram Prezidentimiz tomonidan taqdim etilgan sport jihozlari ham topshirildi.

Tadbir davomida Jismoniy tarbiya va sport vazirining birinchi o'rinbosari Ravshan Ermatov hamda viloyat hokimi Zoyir Mirzaevlar 5000 nafarga yaqin sportchi yoshlar bilan uchrashishdi.

Uchrashuvda vazirning birinchi o'rinbosari Ravshan Ermatov mamlakatimizda keyingi yillarda jismoniy tarbiya va ommaviy sportning yanada rivojlanishi yo'lida qilingan ishlar hamda erishilgan natijalar xususida to'xtalibgina qolmay, Qashqadaryo viloyat sportchi-yoshlariga yuqori natijalarga erishishlari uchun muntazam ravishda sport bilan shug'ullanishlari, ko'zlangan maqsadga erishish uchun mustahkam iroda hamda tinimsiz mehnat talab etilishini va bu harakatlar albatta o'z natijasini berishini takidlab o'tdi.

Jismoniy tarbiya va sport vazirligi Matbuot xizmati