Ravshan Ermatov Qoraqalpog'iston Respublikasidagi sport talim muassasalarining o'quv mashg'ulotlar jarayoni bilan tanishdi

Safar davomida Qoraqalpog'iston Respublikasi Jismoniy tarbiya va sport vazirligi tasarrufidagi sport obektlari holatini ko'zdan kechirish, hududda jismoniy tarbiya va sportni ommalashtirish borasida amalga oshirilayotgan ishlar bilan yaqindan tanishildi.

Jumladan, Nukus olimpiya zaxiralari kollejida yangidan barpo etilgan 150 o'rinli yotoqxona, kollejning asosiy o'quv binosi, futbol stadionining hozirgi holati, sport zallarida tashkil etilgan davolash markazida yaratilgan sharoitlar ko'zdan kechirildi.

SHundan so'ng, Amudaryo tumaniga tashrif buyurib, bu erdagi bolalar-o'smirlar sport maktabida amalga oshirilayotgan ishlar, sport sekciyalari faoliyati, o'tkazilayotgan mashg'ulotlar jarayoni bilan yaqindan tanishildi. Sportchi yoshlar bilan uchrashuv chog'ida hududda sportni rivojlantirish borasidagi dolzarb muammolar yuzasidan o'zaro fikr almashildi.

SHuningdek, Beruniy tumani bolalar-o'smirlar sport maktabida ham bo'lib, hududda amalga oshirilayotgan ishlar bilan yaqindan tanishdi. Xususan, kuz-qish mavsumiga puxta tayyorgarlik ko'rish yuzasidan tegishli ko'rsatmalar berildi.

Kegeyli tumani bolalar-o'smirlar sport maktabiga tashrif davomida bu erda tashkil etilgan sport sekciyalari hamda sport mashg'ulotlari, ularning sifatini o'rganish jarayonida futbol stadioni hamda o'quv binosining umumiy holati qoniqarsizligi aniqlandi. O'z navbatida bolalar-o'smirlar sport maktabi rahbariyatiga aniqlangan muammo va kamchiliklarni bartaraf etish borasida tegishli tavsiyalar berildi.

Taxtako'pir hamda Bo'zatov tumanlaridagi bolalar-o'smirlar sport maktablari qoshida yangidan qurilgan 50x100m. o'lchamdagi suniy qoplamali futbol stadioni 1000 nafar tomoshabinga mo'ljallangan bo'lib, bu erda yaratilgan shart-sharoitlar bemalol respublikamiz miqyosidagi musobaqalarni ham o'tkazish imkonini beradi. Safar davomida masul rahbarlarga sport inshootlaridan samarali foydalanish va yoshlarning bo'sh vaqtlarini mazmunli tashkil etish vazifasi yuklandi.