07 iyu 13:30
Yangiliklar

Tennis

"Rolan Garros". 17 yoshli Mirra Andreevaning ertagi 1/2 finalda tugadi

"Katta Dubulg'a" turkumiga kiruvchi "Rolan Garros" turnirining ayollar o'rtasidagi bahslarida finalchilar aniqlandi.

Musobaqa kashfiyotiga aylangan rossiyalik 17 yoshli Mirra Andreeva 1/2 finalda o'z yurishini to'xtatdi. WTA reytingida 38-o'rinni egallab turgan Andreeva italiyalik Jasmine Paoliniga deyarli qarshiliksiz imkoniyatni boy berib qo'ydi - 3/6, 1/6.

Jasmine bu g'alabasi evaziga finalga chiqish barobarida tennischilarning o'zaro uchrashuvlaridagi hisob muvozanatini ham tiklab qo'ydi - 1:1. Etmish besh daqiqa davom etgan bahsda ikkala tennischi ham 1 tadan eys zarbasini amalga oshirgan. Paolini 4 ta breyk qayd etdi.

Paolinining bosh sovrin uchun kechadigan final uchrashuvidagi raqibasi "Rolan Garros" turnirining amaldagi chempioni, dunyoning birinchi raketkasi, polshalik Iga Svyontek bo'ladi.