Samarqandda ko'pkari bo'yicha jahon chempionati o'tkazilmoqda

Unda qo'shni Qozog'iston, Qirg'iziston, Tojikiston, Afg'onistondan kelgan qariyb 300 nafar chavandoz yurtimiz polvonlari bilan birgalikda jahon chempionligi uchun kurashadi.

Nima uchun “Ko'pkari” deyiladi, bilasizmi? 

Qadimda ota-bobolarimiz ko'proq ov bilan shug'ullanishgan.

Kichkinaliklaridan ot chopishni, kamon, nayza otishni mukammal o'rganishgan. Bobolarimiz bo'rilarni ovlab qaytayotganlarida eng katta ko'k bo'rini, etibor bering, KO'K BO'RIni bir-birlari bilan talashib, ot choptirib kelisharkan. Qishloqqa kirishda ko'k bo'ri kimda qolsa, u shuniki bo'larkan. Mana shu o'yinni ajdodlarimiz “Ko'kbo'ri o'yini”, deyishgan. 

Zamonlar o'tib, bo'rining o'zi anqoning urug'i bo'lib qolgach, ovlangan yovvoyi taka, keyinchalik xonaki takalarni talashib-tortishib o'yinni davom ettiraverishgan. Ammo o'yinning oti Ko'kbo'riligicha qolavergan. 

Bora-bora bu o'yin sport darajasiga ko'tarilib, Xalqaro turnirlar, hatto jahon chempionatlari o'tkaziladigan bo'ldi. Men Qirg'izistonda, Issiqko'l bo'yida Ko'chmanchilarning 3-Xalqaro o'yinlarida ishtirok etish baxtiga muyassar bo'ldim va bu yirik sport anjumanida ham eng ko'p tomoshabinni yiqqan va eng shiddatli kurash ketgan sport turi Ko'kbo'ri bo'lganiga guvoh bo'ldim. 

Qozoq va qirg'iz birodarlarimizda hali ham oti to'g'ri talaffuz qilinib, Ko'kbo'ri, deb yuritilayotgan bu o'yinning nomi bizda zamonlar o'tishi bilan Ko'pkari shakliga kelib qolgan. Ammo to'g'risi, bamanisi – Ko'kbo'ri.