VI Islom Birdamligi o'yinlari. To'rt dzyudochimiz finalda, qolgan uch nafari bronza uchun kurashadi + FOTO

Saudiya Arabistonining Ar-Riyod shahri mezbonligida o'tayotgan VI Islom Birdamligi o'yinlari doirasidagi dzyudo musobaqasining ikkinchi kungi saralash bellashuvlari yakunlanib, kechki final blokida medallar uchun tatamiga chiqadigan juftliklar malum bo'ldi. 

Quvonarlisi, bugun bahslarga kirishgan terma jamoamizning barcha 7 nafar dzyudochisi kechki final dasturida medallar uchun kurashish huquqini qo'lga kiritishdi. Ikki yarim final uchrashuvida o'zbekistonlik dzyudochilar derbisiga guvoh bo'ldik. 

Ayniqsa, og'ir vaznda Alisher Yusupov va Muzaffarbek To'raboev o'rtasidagi bahs ko'pchilikda qiziqish uyg'otdi. Parij-2024 Olimpiadasi sovrindorlarining 8 daqiqa davom etgan bellashuvida To'raboev yuko bahosi evaziga g'alaba qozonib, finalga yo'l oldi. Uni oltin medal uchun bahsda yana bir Parij Olimpiadasi sovrindori, tojikistonlik tajribali dzyudochi Timur Rahimov kutib turibdi. Yusupov esa bronza medali uchun tatamiga chiqadi.    

Bronza medali uchun:

-78 kg: Marjona Ko'chimova – Gunel Hasanli (Ozarbayjon)

+78 kg: Umida Nig'matova – Sivar Dauadi (Tunis)

+100 kg: Alisher Yusupov – Emirxan Joldoshkaziev (Qirg'iz Respublikasi)

Final:

-70 kg: Xurshida Razzoqberdieva – Sudaba Ag'aeva (Ozarbayjon)

-90 kg: SHahzodxo'ja SHaripov – Israpil Sagaipov (Bahrayn)

+78 kg: Irisxon Qurbonboeva – Hilal O'zturk (Turkiya)

+100 kg: Muzaffarbek To'raboev – Temur Rahimov (Tojikiston)

Suratlar muallifi - Anvar Ilyasov