Sergey Fomin Aktobe turnirining birinchi raketkasini mag'lub etdi

Mukofot jamg'armasi 15 000 dollarni tashkil etuvchi ushbu musobaqada hamyurtimiz Sergey Fomin ham muvaffaqiyatli qatnashyapti. Mamlakatimizning ikkinchi raketkasi 1/2 final ishtirokchisiga aylandi. 

Fomin biroz avval yakuniga etgan 1/4 final bahsida musobaqaning birinchi raketkasi, rossiyalik Evgeniy Filippovni 7/6(1), 6/3 hisobida mag'lubiyatga uchratdi. Bir soatu 29 daqiqa davom etgan uchrashuvda Fomin 4, Filippov 9 ta eys zarbasini amalga oshirgan. 

Taqqoslash uchun, turnirda sakkizinchi raqam ostida tasniflangan Fomin ATP reytingida 674, Evgeniy Filippov esa 542-o'rinni egallab turibdi. Endi hamyurtimiz final chiptasi uchun yana bir rus tennischisi Egor Agafonovga qarshi kortga chiqadi. 

Dunyoning 582-raketkasi bo'lib turgan Agafonov bugun 1/4 finalda reytingning 1285-pog'onasida borayotgan qozog'istonlik Arslanbek Aytkulovni qiyinchilik bilan mag'lubiyatga uchratdi - 6/3, 7/6(5).